Kóktemde sý basýy múmkin qaýipti aımaqtar baqylaýda - QR IIDM

NUR-SULTAN.QazAqparat - QR Indýstrııa jáne ınfraqurylymdyq damý mınıstrligi respýblıkalyq mańyzy bar joldardy sý tasqyny kezeńine daıyndaý barysynda qaýiptiń aldyn alý jáne joıý maqsatynda is-sharalar josparyn bekitti.

Ortalyq jáne óńirlik deńgeıde jol qyzmetteri ókilderinen turatyn komıssııalar quryldy, dep habarlaıdy QazAqparat vedomstvonyń baspasóz qyzmetine silteme jasap.

Avtojoldar

Elimiz boıynsha avtojoldar ınfraqurylymyna 1298 kópir jáne 15070 sý ótkizý qubyry kiredi. 482 qaýipti ýchaske, 59 kópir jáne 739 sý ótkizý qubyry baqylaýǵa alyndy. Olarǵa 883 jol-paıdalaný tehnıkasy bekitildi. Táýlik boıy kezekshilik uıymdastyryldy.

Avtojoldar men joldardaǵy ǵımarattar kúndelikti tekserilip turady. Sý ótkizý qubyrlary men kópir astyndaǵy arnalar qardan tazartyla bastady.

Sý tasqynyna qarsy jumystardy ýaqytyly uıymdastyrý úshin qajetti materıaldar: 7,8 myń m3 qum, 12,2 myń m3 tas, 14,7 myń m3 qıyrshyq tas, 52,6 myń qap, 679 tonna JJM jáne 124 temirbeton qubyrlar daıyndaldy.

Mundaı is-sharalar avtojoldardy ustaýǵa bólingen qarajat arqyly iske asyrylady.

Temir jol tósemi

Poezdardyń úzdiksiz jáne qaýipsiz júrýin, joldy, ǵımarattardy ýaqtyly daıyndaý maqsatynda «QTJ» ulttyq kompanııasy aýmaqtyq uıymdarmen jáne tótenshe jaǵdaılar jónindegi oblystyq bólimshelermen birlesip, sý qoımalary men agrotehnıkalyq bógetterdiń jaı-kúıin tekserýde. Kópirler, qubyrlar jáne drenajdy qudyqtardyń tesikterin qardan tazalaý, taý jáne sý burǵysh aryqtardy, naýalar men kıývetterdi ashý jumystary bastaldy.

Tasqyn sýdyń ótýi kezinde táýlik boıy kezekshilik uıymdastyrylyp, qosymsha baqylaý jasalatyn 673 qaýipti orynnyń (qubyrlar, kópirler, jerjol) tizbesi anyqtaldy.

Keste boıynsha být tastar, relsti paketter, temirbeton shpaldar tıelgen 45 poezd (328 vagonnan) jasaqtaldy. Arnaıy tehnıkalary (krandar, traktorlar jáne býldozerler) bar 84 qalpyna keltirý jáne órt sóndirý poıyzy da daıyn tur. 61 myń adamdy evakýatsııalaý úshin 1713 lokomotıv jáne 1 603 vagon daıyndaldy. Tehnıka men materıaldardyń ázirligi -100%.

2021-2023 jyldarǵa arnalǵan sý tasqyny qaýpiniń aldyn alý jáne joıý jónindegi keshendi is-sharalar aıasynda QR IIDM Qaraǵandy oblysynyń «Kókpekti-Qaraǵaıly» ýchaskesinde Qarasor kólin aınalyp ótetin temirjol salý kózdelgen. Qazirgi ýaqytta atalǵan joba QR Ulttyq ekonomıka mınıstrliginde ekonomıkalyq saraptamadan ótýde.