Kóktemde sý basýdy boldyrmas úshin Mańǵystaýda ýaqytsha aryqtar qazylady
AQTAÝ. QazAqparat - Mańǵystaýda kóktemgi sý tasqyny qarsańynda ýaqytsha aryq júıesi qazyldy, dep habarlaıdy «QazAqparat» HAA tilshisi.
Jyl saıyn tolassyz jaýǵan jaýynnan Mańǵystaý oblysy eldi mekenderiniń belgili bir aýmaqtarynda seldiń paıda bolýy sebepti bıyl Jańaózende jáne óńirdiń 4 eldi mekeni men 3 aýdanynda ýaqytsha aryq júıesi qazyldy. Bul týraly Ortalyq kommýnıkatsııalar qyzmeti alańynda «Sý tasqyny kezeńinen qaýipsiz ótýge daıyndyq» atty brıfıngte aıtyldy.
«Munaıly aýdanynyń eldi mekenderinde tıptik drenajdy júıeler qurylysyna deıin aryqtar qazylyp, 3 shaqyrymnan astam qubyrlar ornatyldy, osylaısha ýaqytsha aryq júıesi qamtyldy. Qalalar men aýdandardyń ákimdikteri (jasandy) sý ótkizý ǵımarattaryn tazalaý jáne jóndeý jumystaryn júrgizýde. Mańǵystaý aýdany «Qalamqas» ken ornyndaǵy (uzyndyǵy 30,4 shaqyrym) jáne Túpqaraǵan aýdany «Qarajanbas» kenishindegi (16 shaqyrym) sýdan qorǵaıtyn eki bógettiń jaǵdaıy qanaǵattanarlyq. Teńiz deńgeıi qalypty jáne tereńdigi 27-30 metr aınalasynda. Tótenshe jaǵdaıdy eskertip, saldaryn joıý boıynsha arnaıy sharalar atqarý úshin 843 adam, 127 dana tehnıka, 10 júzý quraldary jáne 31 motopompadan ІІM jáne jergilikti atqarý bıliginiń toby quryldy. Sondaı-aq, qajet bolǵan jaǵdaıda jeke quramy 575 adam, 112 dana tehnıkany quraıtyn jedel áreket etý jasaqtarynyń kúsh-quraldary tartylady. Oblysta sý tasqyny jaǵdaıyna 1145 tonna ınertti materıal, 1252 tonna janar-jaǵarmaı, 1050 dana ydys-qap satyp alyndy, ákimdikter men azyq-túlik jetkizetin uıymdar arasynda 87 shart bekitildi», - dedi Mańǵystaý oblysy TJ departamenti basshysynyń orynbasary, azamattyq qorǵaý polkovnıgi Rámil Kamalov.
Mańǵystaý oblysynyń 2017 jylǵy Tótenshe jaǵdaıǵa jınaǵan qory 120 mıllıon teńge, qalalar men aýdandardyń qory 10 mıllıon teńge.
Mańǵystaý oblysy sý tasqyny kezeńi jaǵdaıy turaqty. Sınoptıkterdiń boljaýynsha, jaqyn arada mol jańbyr jaýmaıdy.
