Kóktemde qustardy atýǵa tyıym salyndy

ASTANA. QazAqparat - QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıteti bıylǵy aqpannyń ortasynan bastap 14 maýsymǵa deıin ań aýlaýǵa engizilgen shekteýge baılanysty túsinikteme berdi, dep habarlaıdy QazAQparat. 

«Buǵan kóp faktorlar yqpal etti. Birinshiden, kóktemgi ańshylyq qustardyń uıa salý naýqanyna keri áser etedi. Bul rette eń aldymen belsendi ári reprodýktıvtik jaǵynan baǵaly atalyqtar atyp alynyp, bul óz kezeginde túrlerdiń gendik qoryn nasharlatady»,-dep toqtaldy Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Marlen Aınabekov Ortalyq kommýnıkatsııalar qyzmetindegi baspasóz máslıhatynda.

Onyń sózine qaraǵanda, ǵylymı uıymdardyń zertteýinde qustardyń popýlıatsııasy 2 mıllıonǵa azaıǵan.

«Biz ańshylyq sharýashylyqtarmen, Zoologııa ınstıtýtymen jáne Qazaqstan bıoalýantúrlilikti saqtaý qaýymdastyǵymen birge respýblıkanyń barlyq aýmaǵynda kóktemgi ań aýlaý kezinde jabaıy qustardy aýlaýǵa tyıym salý máselesin pysyqtadyq. Atalǵan ǵylymı jáne qoǵamdyq uıymdar qustardyń uıa salý kezeńinde kóktemgi ań aýlaýǵa tyıym salynýyna qoldaý bildirdi»,-dedi ol.

Osy rette kem degen úsh jylǵa bul shekteýdi saqtaý usynysy qarastyryldy. Túrler boıynsha bul tizimde úırekter men ózge de jyl qustary qamtylyp otyr.

Atap aıtqanda, tıisti sheshimdi zerdeleý kezinde reseılik tájirıbe eskerildi. Kórshiles elde ańshylyqqa shekteý 10 jylǵa engizilgendikten, popýlıatsııa 5 mıllıonǵa artqan kórinedi. «Popýlıatsııa tıisti deńgeıge jetken kezde, ańshylyqty qaıta ashýǵa bolady»,-dedi Aınabek.

Mınıstrliktiń málimetinshe, jabaıy qustardyń sany azaıyp otyrǵanda, brakonerlerdiń sany kóbeıip barady. 2016 jylǵy kóktemgi ań aýlaý kezeńinde el aýmaǵynda ákimshilik quqyq buzýshylyq boıynsha 758 fakti tirkeldi. Al 2015 jyly zańsyz ań aýlaýdyń 636 faktisi tirkelgen bolatyn. ıAǵnı, ań aýlaý qaǵıdarlarynyń buzylýy arta túsýde.

«Eger de zań buzýshylyqtar oryn alsa, biz ákimshilik aıppuldardy salamyz. Qazirgi kezde normatıvtik-quqyqtyq aktilerdi qaıta qarastyryp jatyrmyz jáne aıppul boıynsha túzetýlerdi Parlamentke engizýdemiz. Meniń oıymsha, aıyppul kólemi bir qus úshin 40-50 myń teńgege deıin jetedi. Uıa salý kezeńi tolyq aıaqtalyp, balapandary qanattanǵannan keıin kúzde ańshylyq maýsymy ashylady»,-dedi ol.