Kóktemde qazaq dalasyna taǵy eki jolbarys jiberiledi
ASTANA. KAZINFORM — Qazir jolbarystar arnaıy qorshaýlarda tabıǵı ortaǵa beıimdelip jatyr. Janýarlardyń densaýlyq jaǵdaıy men óz betinshe tirshilik etýge daıyndyǵyna qaraı tabıǵı ortaǵa jiberý sheshimi qabyldanady. Jalpy 2033 jylǵa deıin Qazaqstannyń jabaıy tabıǵatyna shamamen 10 jolbarys jiberý josparlanǵan.
Mamandar Balqash óńiriniń ekojúıesi qansha jolbarysty asyraı alatynyn zerttep jatyr. Osy maqsatta tabıǵatqa jiberilgen alǵashqy jyrtqyshtardyń tirshiligi baqylanyp, jańa aýmaqqa beıimdelýi baqylanýda.
«Amýr jolbarysy» ortalyǵynyń bas dırektory Sergeı Aramılevtiń aıtýynsha, zertteý nátıjeleri jolbarys popýlıatsııasyn qalpyna keltirýge nıetti ózge elder úshin de mańyzdy bolýy múmkin.
Onyń sózinshe, «Іle-Balqash» memlekettik tabıǵı rezervatyna eki eresek Amýr jolbarysyn jiberý ǵylymı tájirıbeniń alǵashqy kezeńi sanalady. Mamandardyń baqylaýy bul aýmaqtyń turaqty jolbarys popýlıatsııasyn qalyptastyrýǵa qanshalyqty qolaıly ekenin anyqtaýǵa, sondaı-aq baǵdarlamanyń kelesi kezeńderine qandaı janýarlardy irikteý keregin anyqtaýǵa múmkindik beredi.
— Jolbarystardyń jańa ortaǵa beıimdelýin baqylaý arqyly aýmaqtyń qanshalyqty qolaıly ekenin jáne munda qansha jolbarys mekendeı alatynyn anyqtaımyz. Biz úshin eń mańyzdysy — popýlıatsııany kóbeıtý baǵdarlamasynda qandaı jolbarystardy kóbeıtý qajet ekenin túsiný, — dedi Sergeı Aramılev.
Mamandar jyrtqyshtardyń tabıǵı jaǵdaıǵa beıimdelýin, tirshilik etý aýmaǵyn ıgerýin jáne ań aýlaý daǵdylaryn baqylaýdy jalǵastyrady. Jınalǵan derekter jolbarys popýlıatsııasyn qalpyna keltirý jónindegi aldaǵy jospardy naqtylaýǵa negiz bolady.
S. Aramılev buǵan deıin tarıhta tabıǵattan joıylyp ketken iri sútqorekti túri, ásirese jyrtqysh janýar qaıta jersindirilmegenin eske saldy. Sondyqtan Qazaqstanda júrgizilip jatqan ǵylymı tájirıbe munyń múmkin ekenin ózge elderge de aıǵaqtaıdy.
— Baǵdarlamanyń kelesi kezeńine arnalǵan taǵy eki jolbarys kúshigi daıyndalyp jatyr. Qazir olar arnaıy qorshaýlarda tabıǵı ortaǵa beıimdelý kezeńinen ótýde. Aldyn ala jospar boıynsha, kúshikterdi 2027 jyldyń kóktemi men jazynda tabıǵatqa jiberý kózdelgen. Alaıda túpkilikti sheshim janýarlardyń densaýlyǵyna, minez-qulqyna jáne óz betinshe tirshilik etýge daıyndyǵyna qaraı qabyldanady, — dedi ortalyq basshysy.
Baǵdarlamanyń alǵashqy kezeńinde, ıaǵnı 2033 jylǵa deıin tabıǵatqa shamamen 10 jolbarys jiberý josparlanǵan. Al jobanyń ózi shamamen 35 jylǵa josparlanǵan. Eger baǵdarlama oıdaǵydaı júzege assa, ony ári qaraı jalǵastyrý máselesi de qarastyrylýy múmkin.
Eske sala ketsek, jaqynda «Іle-Balqash» memlekettik tabıǵı rezervatyna Amýr esimdi ekinshi jolbarys jiberilgen edi.
