Kóktemde kartop baǵasy ósýi múmkin be

ASTANA. KAZINFORM – Kóktemde negizgi kókónis ónimderine baǵanyń qubylý qaýpi bar ma? Osy oraıda bıyl jańa ónim shyqqansha kartop baǵasy sharyqtaýy múmkin be? Bul suraqqa Saýda jáne ıntegratsııa mınıstrligi jaýap berdi.

- Aıta ketý qajet, memlekettik organdar óndirýshiler tarapynan baǵanyń qalyptasýyn rettemeıdi. Kartoptyń baǵasy naryqtyq jolmen qalyptasady jáne ishki ári syrtqy faktorlardyń jıyntyǵyna baılanysty bolady. Olardyń qatarynda qor kólemi, suranys pen usynys deńgeıi, logıstıkalyq shyǵyndar, sondaı-aq ımporttyq-eksporttyq úderister bar. Osyǵan baılanysty jańa ónim naryqqa túskenge deıin maýsymaralyq kezeńge baılanysty baǵanyń ózgerýi múmkin, - delingen mınıstrliktiń Kazinform agenttigine bergen jaýabynda.

Vedomstvonyń málimetinshe, baǵanyń maýsymdyq aýytqýyn tejeý jáne ishki naryqty tolyqtyrý maqsatynda ımporttyq jetkizilimder uıymdastyrylady.

Aıta keteıik, naýryz aıynyń basynda elimizde kartop eksporty jalǵasatyny, jumyrtqa ımporty ýaqytsha toqtaıtyny málim boldy.

Buǵan deıin habarlanǵandaı, Pavlodar qoımalarynda 50 myń tonna kartop pen 30 myń tonna sábiz saqtalyp tur.