Kóktemde bolýy yqtımal sý tasqynymen kúreske 10 myńnan astam qutqarýshy daıyn
NUR-SULTAN. QazAqparat – Sý tasqynymen kúreske 10 myńnan astam qutqarýshy daıyn. Bul týraly QR Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.
«Kóktemgi kezeńdegi tótenshe jaǵdaılardyń saldaryn joıý boıynsha TJM Respýblıkalyq jedel shtaby men jedel tobynyń quramy anyqtaldy. Jeke quramnyń jalpy sany 10 myń adamnan astam jáne 1880 birlikten astam tehnıkasy bar azamattyq qorǵaý kúshteri men quraldarynyń toptamasy quryldy. Onyń ishinde 22 tikushaq, 308 júzý quraly men shamamen bir myń motopompa bar. Kúshterdi jedel aýystyrý jáne zardap shekken halyqty shuǵyl evakýatsııalaý jaǵdaıynda «Qazavıaqutqarý» AQ tikushaqtary ázirlikte bolady», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, TJM Azamattyq qorǵanys áskerı bólimderinde zardap shekken turǵyndar úshin 1000 adamǵa arnalǵan 3 shatyrly lager ázirlengen.
«Halyqty qulaqtandyrý, onyń ishinde teleradıo jıilikterine qosylý, SMS-habarlamalar jiberý, ınternet-resýrstardy paıdalaný jáne daýys ulǵaıtqysh qurylǵylary bar patrýldik polıtsııa avtomashınalaryn tartý máseleleri pysyqtaldy. Sý resýrstary jónindegi komıtetpen jáne Qazgıdrometpen der ýaqytynda basqarýshylyq sheshimder qabyldaý úshin jedel aqparat almasý boıynsha is-qımyldyń birlesken jospary ázirlendi», - dedi Ibragım Kúlshimbaev.
