Kóktemde «Aqtóbe-Astrahan» tasjolyn jóndeý jumysy bastalady
AQTÓBE. QazAqparat - Kóktemde «Aqtóbe-Astrahan» tasjolyn jóndeý jumysy bastalady. Qazirgi ýaqytta merdiger mekemelerdi anyqtaý jumysy júrip jatyr, dep habarlaıdy QazAqparat tilshisi.
Ortalyq pen Batysty jalǵaıtyn «Aqtóbe-Astrahan» tasjolyn kúrdeli jóndeý jumysy bastalady. Aqtóbe-Qopa, Aqtóbe-Maqat sekildi eki ýchaskege bólingen joldy qaıta jaraqtandyrýǵa alǵashynda 40-tan astam merdiger kompanııa nıet bildirgen. Olar iriktelip, 37-si qaldy. Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıevtiń aıtýynsha, ekonomıkalyq mańyzy bar jol aldaǵy 2-3 jylda qaıta qalpyna keltirilýi tıis. Jol halyqaralyq bankterdiń qatysýymen jóndeledi. Birer apta ishinde qujat rásimdeý jumystary aıaqtalyp, naýryz aıynyń aıaǵyna taman jóndeý jumystary bastalýy múmkin.
«Aqtóbe-Orsk baǵytyndaǵy joldy da kúrdeli jóndeýge 3 mıllıard teńgeden astam qarjy jumsalady. Bul baǵyttaǵy joldy qalypqa keltirý jumysy bastalyp ketti. Jol salý kezinde kópirler qalpyna keltirilip, keı jerlerge jańasy salynady. Bıyl bul jumystarǵa 950 mıllıon teńge bólindi»,- dedi A.Osmanǵalıev.
Aıta keteıik, bıyl Aqtóbe oblysyndaǵy joldardy jóndeýge 7,9 mıllıard teńge jumsalady. Ótken jyly jóndelip, bıyl oı-shuńqyrlar paıda bolǵandary merdiger mekemelerdiń qarjysyna qalpyna keltiriledi. Jol tóseýshiler 3-5 jylǵa kepildik bergen.
