Kóktemde 276 eldi mekendi sý basý qaýpi bar - TJM
NUR-SULTAN. QazAqparat – Kóktemde 276 eldi mekendi sý basý qaýpi saqtalyp otyr. Bul týraly QR Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi
«Sý tasqyny kezeńin qaýipsiz ótkizý máseleleri elimizdiń Úkimetiniń, Tótenshe jaǵdaılar mınıstrliginiń, óńirlerdiń ákimdikteri basshylyǵynyń erekshe baqylaýynda. Osy maqsatta jyl saıyn sý tasqyny kezeńinde tótenshe jaǵdaıdyń týyndaý qaýpin azaıtýǵa baǵyttalǵan is-sharalar kesheni júrgiziledi. Bizdiń mınıstrlik eldegi ótken jyldar ishindegi tájirıbeni eskere otyryp, kóktemde sý astynda qalýy múmkin 900-den astam eldi mekendi aıqyndady», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, 2017 jyly ázirlengen Sý tasqyny qaýpiniń aldyn alý jáne joıý jónindegi jol kartasy 315 eldi mekendi qorǵaýǵa, 314 aýyl men eldi mekenge tónetin táýekeldi tómendetýge múmkindik berdi. 4 jyldyń ishinde 400-den astam ınjenerlik-qorǵanys is-sharalary júzege asyryldy.
«Degenmen, 276 eldi mekendi sý basý qaýpi saqtalyp otyr. Osyǵan oraı, ótken jyldyń sońynda Tótenshe jaǵdaılar mınıstrliginiń bastamasymen múddeli memlekettik organdarmen birge 2023 jylǵa deıingi jol kartasy ázirlendi»,- dedi Ibragım Kúlshimbaev.
