Kóktem-jaz maýsymynda Qazaqstannan shetelge 10-nan astam jańa reıs ashylady

ASTANA. QazAqparat - Kóktem-jaz maýsymyna qaraı Doha, Ankara, Medına, Baký jáne Dýshanbege jańa reıster ashylady. Sonymen qatar, Ystanbul, Tbılısı, Phýket, Male, Delı, Chendý, London, Iraklıon jáne Podgorıtsaǵa reıster kóbeıedi, dep habarlaıdy QazAqparat Mádenıet jáne sport mınıstrligine silteme jasap.

Bul avıareısterdi qabyldaýǵa Almaty men Astana áýejaılary ǵana emes, Shymkent, Aqtaý jáne Túrkistan áýe aılaqtary jumyldyrylady.

Birqatar sheteldik avıakompanııalar da Qazaqstanmen áýe qatynasyn jolǵa qoıýdy josparlap otyr.

Mysaly, malaızııalyq Air Asia H loýkosteri Kýala-Lýmpýrdan Almatyǵa, al Thai Air Asia taı tasymaldaýshysy Bangkoktan Almatyǵa ushady.

Irandyq Qeshm Air kompanııasy Almaty – Tokıo baǵyty boıynsha reıs ashýdy josparlap otyr.

Omandyq SalamAir 1 shildeden bastap Maskat – Almaty reısin iske qosady.

Budan basqa, Air Astana otandyq tasymaldaýshysy Almaty men Tel-Avıv arasynda aptasyna eki turaqty reısti oryndaý týraly máseleni pysyqtaýda.

«Jańa baǵyttardy ashý – qazaqstandyq týrızmdi damytý úshin mańyzdy qadam. Osynyń arqasynda elimizge saıahattaýdy josparlap otyrǵan sheteldik qonaqtardyń Qazaqstanǵa kelýine kóp múmkindik paıda bolady. Jańa marshrýttardy iske qosý baǵytynda sheteldik áriptestermen kelissózder únemi júrgiziledi. Mysaly, ótken jyly 7 elge 10 jańa baǵyt ashyldy. Bıyl da bul jumys jalǵasyn tabady», – deıdi týrızm ındýstrııasy komıtetiniń tóraǵasy Dastan Ryspekov.