«Kóktem-Kúz 2015» Ulttyq stýdentter lıgasy oıyndaryna 30 JOO komandalary qatysatyn boldy (FOTO)
ASTANA. QazAqparat - Búgin Nazarbaev Ýnıversıteti sport ortalyǵynda Bilim jáne ǵylym mınıstrliginiń Qazaqstan fýtbol federatsııasymen birge uıymdastyrǵan «Kóktem-Kúz-2015» Ulttyq stýdentter lıgasy (USL) oıyndarynyń ashylý saltanaty bolyp ótti.
QR Bilim jáne ǵylym mınıstrliginiń baspasóz qyzmeti habarlady.
Bul maýsymda jarysqa 30 joǵarǵy oqý ornynyń komandalary qatysady. Bıyl Astana jáne Almaty qalasynyń joǵary oqý oryndarynyń byltyrǵy komandalary men qatysýshylarynan bólek, týrnırge Qaraǵandy men Shymkent qalasynyń stýdentteri atsalyspaq. USL-dyń astanalyq tobyna 6 komanda enedi. Almaty qalasy joǵarǵy oqý oryndary atynan 11, Shymkent qalasynan 9 jáne Qaraǵandy qalasynan 4 komanda kelmek.
Sharanyń ashylý saltanatynda Bilim jáne ǵylym mınıstri Aslan Sárinjipov: «Elbasynyń tapsyrmasymen Qazaqstanda buqaralyq sportqa erekshe mán berilýde. Atalǵan stýdentter lıgasy osy ortaq isimizge óz úlesin qosatyny sózsiz», - dep atap ótti.
Mınıstrlik elimizdegi stýdentterdiń sporttyq qozǵalysyn damytýdy josparlap otyr. Bıylǵy jazdyń ózinde stýdenttik lıga aıasynda basketboldan jarystar bastalady. Al kelesi jyly bul estafetany voleıbolıster jalǵastyrmaq.
Bıylǵy fýtbol týrnıriniń basty syılyqtarynyń biri - eń úzdik oıynshylardyń ulttyq quramamen birge 22-29 tamyzda Barzılııada stýdentter arasynda ótetin álem chempıonatyna qatysýy bolmaq.
Esterińizge sala keteıik, ótken jylǵy týrnır jeńimpazdary, ıaǵnı L.Gýmılev atyndaǵy EUÝ komandasy 6 maýsymda Berlınde ótetin Chempıondar lıgasynyń fınalyna kórermen retinde barýǵa joldama alǵan bolatyn.
