Kóktem kelgeli 13 astanalyqty kene shaǵyp aldy
NUR-SULTAN. QazAqparat – Nur-Sultan qalasy sanıtarlyq-epıdemıologııalyq baqylaý departamentiniń bólim basshysy Naǵıma Shataeva keneniń shaǵýynan bolatyn asqynýlardyń negizgi belgilerin atady, dep habarlaıdy QazAqparat tilshisi.
«Keneler birqatar juqpaly aýrýlardyń qozdyrǵyshy bolyp tabylady. Eń qaýipti aýrý - bul negizinen júıke júıesine áser etetin vırýstyq kene entsefalıti. Adamǵa ol negizinen keneniń shaǵýy arqyly juǵady. Inkýbatsııalyq kezeń shaqqan sátten bastap ortasha eseppen 7-14 kúnge sozylady. Aýrý jedel bastalyp, qaltyraý, dene qyzýynyń 38-40°C deıin kúrt kóterilýi, qatty bas aýrýy, júrek aıný, qusý, álsizdik baıqalady», - deıdi maman.
Onyń aıtýynsha, kene shaǵý qaýpi jaz boıy saqtalady.
«Sáýir aıynan bastap qazanǵa deıin epıdemııalyq maýsym bolyp esepteledi. Degen ásirese kóktem men kúzde shabýyl jıileıdi. 2022 jyldyń sáýir aıynyń basynan bastap kene shaqqanyn aıtyp Nur-Sultan qalasynyń statsıonaryna 13 adam júgindi. Kórsetilgen adamdar turaqty termometrııamen jıyrma bir kún boıy turǵylyqty jeri boıynsha dıspanserlik baqylaýǵa alyndy. Salystyrsaq, byltyr epıdemıologııalyq maýsymda 157 adam, 2020 jyly 67 adam emdeldi», - deıdi Naǵıma Shataeva.
Sanıtarlyq-epıdemıologııalyq departament ókili kene shaqqan adam birden metsına mamandaryna qaralýy kerektigin basa aıtty.
«Kene shaǵýy anyqtalǵan jaǵdaıda dereý jaqyn mańdaǵy medıtsınalyq densaýlyq saqtaý uıymyna habarlasý qajet. Eger bul múmkin bolmasa, keneni maqta jipten nemese ilmekpen ózińiz alyńyz. Keneni alyp tastaǵannan keıin qolyńyzdy sabynmen jýyp, tistegen jerdi quramynda spırt bar zatpen zalalsyzdandyrý qajet emdeý kerek. Keneni alyp tastaǵannan keıin profılaktıkalyq em taǵaıyndaý jáne qysqa merzimde medıtsınalyq baqylaý belgileý úshin ınfektsıonıst-dárigerge nemese terapevt-dárigerge, pedıatrǵa mindetti túrde qaralý qajet», - dedi maman.
Onyń aıtýynsha, kene entsefalıtiniń aldyn alýdyń jalǵyz joly - vaktsınatsııa.
4 mamyrdaǵy málimet boıynsha, Almatyda sáýir aıynda 40 adamdy kene shaqqan.
