Kóktem-2021: Túrkistan oblysynda respýblıkalyq komandalyq-shtabtyq oqý-jattyǵý ótip jatyr
Stsenarıı boıynsha Túrkistan oblysy tótenshe jaǵdaılar departamentiniń jedel kezekshisine «Tasqyn-2002» dabyly kelip tústi.
Onda nóserli jaýyn saldarynan jáne qardyń erýinen, sonymen qatar, Sasyq ózeniniń sýy kúrt kóterilýinen Báıdibek aýdanymen shekaralas Arys qalasy Ekpindi eldi mekeniniń úılerin sý basqany habarlandy.
Eń aldymen halyqty qulaqtandyrý máseleleri pysyqtalyp, sý tasqyny jaǵdaıynyń yqtımal kúrdelenýine den qoıý úshin qutqarý toby quryldy.
300-ge jýyq qyzmetker men 50 tehnıka jumyldyryldy.
Atalǵan shara azamattyq qorǵaýdyń memlekettik júıesin kóktemgi kezeńdegi apattarǵa daıyndaý, sondaı-aq sý tasqyny qaýpi jaǵdaıynda el halqy men aýmaǵyn qorǵaýdy uıymdastyrý boıynsha basqarýshylyq sheshimderdi pysyqtaý maqsatynda ótkizildi.
Ahýal ortalyǵynyń bazasynda tótenshe jaǵdaılar departamentiniń daǵdarys ortalyǵy ashyldy.
Onda barlyq jaýapty qyzmetter men basqarmalarmen, aýdandyq ákimdiktermen birlesip, qoıylǵan mindetter boıynsha oblystyq TJ shtabyn qurý arqyly birlesken is-sharalar júrgizilip jatyr.
Aıta keteıik, elimizdiń Tótenshe jaǵdaılar mınıstrliginiń nusqaýlyǵy boıynsha Túrkistan oblysy men oǵan qarasty aýdandarda «Kóktem-2021» respýblıkalyq komandalyq-shtabtyq oqý-jattyǵýy ótkizilýde.
Negizgi maqsat – tótenshe jaǵdaılardyń aldyn alý jáne olardy joıý, kóktemgi kezeńge qural-jabdyqtardy daıyndaý, azamattyq qorǵaýdaǵy aýdandyq júıeni odan ári jetildirý.
