Kóktegi kórshi: astronomdar Jerden 18 jaryq jyly qashyqtyqtan ekzoplaneta tapty

ASTANA. KAZINFORM — Ekzoplanetalardy anyqtaýǵa kómektesetin eki joǵary dáldiktegi quraldyń kómegimen tabylǵan bul ǵalamshar «GJ 251 c» dep ataldy, dep habarlaıdy Anadolý agenttigi.

AQSh-taǵy Kalıfornııa ýnıversıtetiniń zertteýshileri Jerden 18 jaryq jyly qashyqtyqta ornalasqan M tıpti ergejeıli juldyzdyń ómir súrýge qolaıly aımaǵynan jańa «sýperjer» ekzoplanetany anyqtady.

Ekzoplanetalardy anyqtaýǵa arnalǵan eki joǵary dáldiktegi baqylaý quraly arqyly tabylǵan bul ǵalamshar «GJ 251 c» ataýyn aldy.

Zertteýde atalǵan joǵary dáldiktegi baqylaý quraldarynyń ekzoplanetanyń M tıpti ergejeıli juldyzǵa álsiz tartylatynyn jáne onyń qurylymy Jerge uqsas tasty bolýy múmkin ekenin anyqtaǵany aıtylǵan.

Planetanyń betki temperatýrasy suıyq sý úshin qolaıly bolýy yqtımal, bul – tirshiliktiń paıda bolýynyń negizgi sharttarynyń biri.

GJ 251 c planetasy Jerden birneshe ese úlken jáne Qus joly galaktıkasynyń salystyrmaly túrde jaqyn bóliginde ornalasqan.

Zertteýshilerdiń biri Pol Robertson bul týraly bylaı dedi:

«Qazirgi ýaqytqa deıin biz sonshalyqty kóp ekzoplaneta ashtyq, sondyqtan jańa planetanyń tabylýy burynǵydaı úlken jańalyq bolyp sanalmaıdy. Alaıda bul ashylymnyń erekshe qundylyǵy — onyń negizgi juldyzy bizden nebári 18 jaryq jyly qashyqtyqta ornalasqan. Ǵaryshtyq ólshemmen alǵanda, bul ony kórshi ǵalamshar deýge bolady».

Zertteý nátıjeleri «The Astronomical Journal» jýrnalynda jarııalandy.

Aıta ketsek, buǵan deıin ǵalamsharlardyń sırek sherýin tamashalaýǵa bolatynyn jazdyq. Al onyń aldynda ǵalamsharlar sherýi Jerge de, turǵyndarǵa da áser etpeıtinin habarlaǵanbyz.