Kóktaıǵaqtan apatqa ushyraǵan jolaýshylardyń jaǵdaıy belgili boldy
ALMATY. QazAqparat - Almatyda kóktaıǵaq kesirinen bolǵan kólik apatynan zardap shekken jolaýshylardyń jaǵdaıy belgili boldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmeti habarlaǵandaı, Almaty oblystyq kóp salaly aýrýhanasyna 8 adam túsken. Onyń ishinde jeteýi jolaýshy, bireýi avtobýs júrgizýshisi.
Dárigerler barlyq adamdardyń densaýlyǵyn tekserip shyqty.
«Túsken adamdardy barlyq mamandar qarap shyqty. Olardyń eshqaısysyna aýrýhanaǵa jatýǵa negiz bolǵan joq. Barlyǵy jeńil jaraqattanǵan, olar ambýlatorııalyq em qabyldaýǵa úılerine jiberildi», - dedi basqarmadan.
Eske sala keteıik, Almatyda Tátibekov kóshesinde iri jol apaty bolǵandyǵy týraly habarlaǵan edik.
Polıtsııa bolǵan oqıǵanyń mán-jaıyn tekserip jatyr.
