Kóktaıǵaqta qulap zardap shekken adam qalaı ótemaqy ala alady

ÓSKEMEN. KAZINFORM – Qys kezinde halyq kóktaıǵaqtan keı kóshelerde aıaq alyp júre almaı qalatyny jasyryn emes. Qulap, aıaq-qolyn syndyryp alyp ta jatady. Al mundaı jaǵdaıǵa tap bolǵan adamnyń ótemaqy talap etýge quqyǵy bar. Biraq ta muny kóbisi bile bermeıdi.

Aýmaqqa kim jaýapty ekenin anyqtap alyńyz

Ótemaqy alý úshin ne isteý kerektigin Shyǵys Qazaqstan oblysy Saýda jáne tutynýshylardyń quqyqtaryn qorǵaý departamentinen bilip kórdik. 

- Eń áýeli oqıǵa bolǵan aýmaqtyń kimniń qaraýynda ekenin anyqtap alý kerek. ıAǵnı, másele adamnyń naqty qaı jerde jaraqat alǵanyna baılanysty. Ol aýmaqty kim kútip-ustaıdy nemese kimniń menshiginde degendeı. Eger adam qala kóshelerinde nemese trotýarda qulap jaraqat alsa, jaýapkershilik sol aýmaqqa qyzmet kórsetetin uıymǵa júkteledi. Óskemen qalasynda jaıaý júrginshiler joldaryn kútip-ustaý «Taza Óskemen» kásipornyna júktelgen, - dep túsindirdi departament basshysy Ashat Saǵıdoldın.

Bul uıym qardy ýaqtyly tazalaýǵa, joldardy kóktaıǵaqqa qarsy materıaldarmen sebýge jáne turǵyndardyń qaýipsiz qozǵalysyn qamtamasyz etýge jaýapty.

Al eger jaraqat turǵyn úı aýlasynda alynsa, jaýapkershilik sol aýmaqqa qyzmet kórsetetin uıymǵa (PIK, Múlik ıeleriniń qaýymdastyǵy jáne t.b.) júkteledi. Olar aýlany, jaıaý júrginshiler joldaryn, baspaldaqtar men kireberisterdi kútip-ustaýǵa mindetti.

Eger adam dúkenniń, saýda ortalyǵynyń, dárihananyń nemese ózge de kásipkerlik nysanynyń kireberisinde taıyp qulasa, jaýapkershilik ǵımarattyń menshik ıesine nemese jalǵa alýshysyna tıesili.

Kinálilerdi qalaı jaýapqa tartýǵa bolady?

Ótemaqy alý úshin jaraqat alǵanyńyzdy jáne oqıǵa ornyn tirkep alý mańyzdy. Sol jerge jedel járdem shaqyryńyz. Dárigerler jaraqattyń naqty qaı jerde alynǵanyn tirkeıdi. 

Qosymsha túrde oqıǵa ornyn sýretke túsirip, kýágerler bolsa, olardyń baılanys derekterin jazyp alyp, dıagnoz ben emdelgenińizdi rastaıtyn barlyq medıtsınalyq qujattardy saqtap alyńyz.

- Ótemaqy alý úshin jaraqat alǵan aýmaqqa jaýapty uıymǵa nemese menshik ıesine jazbasha ótinish berýińiz kerek. Ótinishte oqıǵanyń mán-jaıy kórsetilip, jaraqattyń aýmaqtyń tıisti deńgeıde kútip-ustalmaýy saldarynan alynǵanyn dáleldeıtin qujattar qosa tirkelýi tıis. Dálel retinde medıtsınalyq anyqtamalar, fotosýretter, dárigerdiń qorytyndylary usynylady, - deıdi departament basshysy. 

Eger uıym óz jaýapkershiligin moıyndasa, másele sotqa deıingi tártippen sheshilip, zardap shekken adamǵa keltirilgen zııan úshin ótemaqy tólenedi.

Al eger bas tartsa, onda sotqa júginýge týra keledi. Sot tártibimen densaýlyqqa keltirilgen zııandy jáne moraldyq shyǵyndy óndirip alýǵa bolady.

Eske salsaq, osyǵan deıin Óskemende kún saıyn kóktaıǵaqtan 100-den astam adam zardap shegetini habarlanǵan.