«Kóktaıǵaqqa qarsy qospadan aıaq kıim búlinýde»: ShQO-da tuzdy paıdalaný shektelmek

ÓSKEMEN. QazAqparat – Shyǵys Qazaqstan oblysynyń ekologtary turǵyndar shaǵymynan soń kóktaıǵaqqa qarsy kóshege shashylatyn qospadaǵy tehnıkalyq tuzdy paıdalanýǵa shekteý qoıý qajettigin aıtýda, dep habarlaıdy QazAqparat tilshisi.

Óskemen qalasynyń turǵyndary kóshege kóktaıǵaq kezinde shashylatyn qospadan aıaq kıim men kólik dóńgelegi búlinip jatqanyna shaǵymdanǵan bolatyn. Soǵan oraı ShQO Ekologııa departamenti «Taza Óskemen» kásipornynyń kóktaıǵaqqa qarsy kóshege shashatyn qospasyna tekserý júrgizgen edi.

«Alaıda QR Investıtsııalar jáne damý mınıstrligi Avtomobıl joldary komıtetiniń buıryǵyna sáıkes, kóktaıǵaqqa qarsy reagentterdegi qum men tuzdyń aralasý paıyzy 80:20-ny quraýy tıis. Tekserý kezinde belgili bolǵandaı, Óskemendegi aralasý paıyzy – 87,5:12,5. ıAǵnı, talapqa saı emes. «Taza Óskemen» kásipornynda joldyń taıǵaqtyǵyn eskere otyryp, qospa daıyndaýdyń da, ony paıdalanýdyń da ishki tehnıkalyq reglamenti joq. Bul jumystar kásiporyn basshylyǵynyń nemese ınjenerlik-tehnıkalyq quramnyń óz sheshimi boıynsha júrgizilip jatyr. Sonyń saldarynan tuz qospasyn paıdalaný esebi de júrgizilmeıdi», - dep habarlady departamenttiń baspasóz qyzmetinen.

Ekologtardyń aıtýynsha, tehnıkalyq tuzdy shamadan tys paıdalaný metaldardyń, aıaq kıimniń buzylýyna, topyraqtyń tuzdanýyna jáne ósimdikterdiń ólýine ákep soǵady. Sondyqtan ekologııa qaýipsizdigin qamtamasyz etý úshin normatıvtik qujattarda qospanyń dozasyn, quramyn jáne qoldaný ádisin retteý asa mańyzdy.

«Óskemen qalasy turǵyndarynyń shaǵymy boıynsha Ekologııa departamenti qospanyń quramyn, qoldanylýyn zertteı kele tehnıkalyq tuzdy paıdalanýdy shekteý qajettigi týraly sheshim shyǵardy. Endi úsh aıdyń ishinde tehnıkalyq tuzdy qoldanýdy sot tártibimen shekteý úshin tıisti sharalar qabyldanady», - delingen aqparatta.