«Kóktaıǵaqqa qarsy qospadan aıaq kıim búlinýde»: Óskemen kommýnaldyq mekemesiniń jaýaby
Áleýmettik jelide qala turǵyndarynyń shaǵymy tarap jatyr. Onda kommýnaldyq qyzmetterdiń qala kóshelerine shashatyn reagentterinen aıaq kıim men kólik dóńgelegi búlinip jatqandyǵy jazylǵan. Jurtshylyq kóktaıǵaqqa qarsy qospa ishinde hımııalyq zattar qoldanylady dep kúdiktenýde.
Osyǵan oraı QazAqparat tilshisi Óskemen qalasy ákimdiginiń «Taza Óskemen» sharýashylyq júrgizý quqyǵyndaǵy kommýnaldyq memlekettik kásipornynyń dırektory Ashat Tájenovke habarlasty.
«Kóktaıǵaq bolǵan kezde kóshelerge qum shashamyz. Eshqandaı hımııalyq reagent qoldanbaıbyz. Jelide jalǵan aqparat tarap jatyr. Reagentterdi shashý – qomaqty qarajatty talap etedi. Bir tonna reagenttiń ózi 1,5 mln teńge turady. Al qalany túgel qamtý úshin shamamen myńǵa jýyq tonna ketedi. Bizde mundaı aýqymdy qarajat qarastyrylmaǵan», - deıdi ol.
Ashat Tájenovtiń aıtýynsha, bıylǵy qysta qalada qar mol túsýde. Qańtar aıynyń basynda Óskemende kenet kún jylynyp, synap baǵanasy +8 gradýsty kórsetken. Sol kezde kóshelerde qum men erigen qar aralasyp ketti.