Kóktaıǵaqqa baılanysty elorda polıtseıleri jolda abaı bolýǵa shaqyrady
NUR-SULTAN. QazAqparat – Elordada qar aralas jańbyr jaýyp, kóktaıǵaq bolýyna baılanysty polıtsııa júrgizýshilerden barynsha saq bolýyn jáne jol qozǵalysy erejesin qatań saqtaýyn suraıdy, dep habarlaıdy QazAqparat Nur-Sultan qalasynyń Polıtsııa departamentiniń baspasóz qyzmetine silteme jasap.
Vedomstvonyń málimetinshe, keshe elordada 80 jol-kólik oqıǵasy tirkeldi, 1 adam zardap shekken.
«Júrgizýshiler qozǵalys kezinde barynsha muqııat jáne saq bolýǵa, jyldamdyq rejımin, qaýipsiz ara qashyqty jáne manevr jasaý erejesin múltiksiz saqtaýǵa, sondaı-aq kenet tejeýden aýlaq bolýy tıis.
Jaıaý júrginshilerden joldy tek belgilengen oryndardan ótýdi suraımyz. Osyǵan baılanysty, biz júrgizýshilerge jaıaý júrginshiler ótkeliniń aldynda qozǵalys jyldamdyǵyn barynsha tómendetip, oqý oryndarynyń janynda óte muqııat bolý kerektigin eskertemiz», delingen habarlamada.
