Pavlodarda jaýǵan alǵashqy qar jol qozǵalysyn qıyndatty
PAVLODAR. KAZINFORM — Pavlodar oblysyna alǵashqy qar jaýdy. Qazirgi ýaqytta kóktaıǵaqqa baılanysty óńirdegi joldarda júrý qıyndap tur.
Túnde Pavlodarǵa alǵashqy qar tústi. Keshkilik bastalǵan jańbyrdyń sońy qarǵa ulasyp, tańerteń oblystyń eldi mekenderin ájeptáýir qar basty. Keı jerde jol júrý qıyndap jatyr.
Tańerteń áleýmettik jelide «Astana-Pavlodar» avtobanynda kólikterge shekteý qoıylǵany týraly aqparat tarady. Elordadan shyqqan jolaýshylar Ekibastuz qalasy tusyna jetkende polıtsııa joldy jaýyp tastaǵan.
— Búgin tańerteńnen bastap Astana-Pavlodar avtobanynda, atap aıtqanda Pavlodar — Qalqaman ýchaskesinde aýa raıynyń qolaısyzdyǵyna baılanysty avtokólikterdiń júrýine shekteý qoıyldy. Betondy jol kóktaıǵaq, kólikterderdiń júrýine asa qaýipti. Qazir kólik quraldary Pavlodar qalasynan shyǵarylmaı jatyr. Shekteýdiń ázirshe qashanǵa deıin jalǵasatyny belgisiz, — dep habarlady 102 operatory.
Keıinnen óńirlik polıtsııa departamenti Pavlodar – Astana avtobanyndaǵy jol ýchaskesine qoıylǵan shekteý saǵat 10:00 shamasynda alynǵanyn habarlady. Polıtsııa ýaqytsha shekteý tańerteńgi saǵat 8.00-10.00 arasynda saqtalǵanyn rastady.
Al «QazAvtojol» ulttyq kompanııasy óz taraptarynan eshbir shekteýdiń engizilmegenin, jol tazalaý jumystary júrip jatqanyn málim etti.
Pavlodar qalasynyń ákimdigi de jol tazalyǵyna jaýapty merdiger kompanııalardyń tehnıkalary shahar kóshelerin qardan tazartyp jatqanyn jetkizdi.
Oblys ortalyǵynyń turǵyndary aýa raıy qolaısyzdyǵyna baılanysty taksı baǵasyn ósip ketkenin de narazylyqtaryn bildirip jatyr. Qazirgi ýaqytta qala boıynsha taksı qyzmetiniń ortasha baǵasy — 1500-2000 teńge.
Qalanyń kommýnaldyq qyzmetteri kúsheıtilgen tártipte jumys istep jatyr.
— Alǵashqy qardyń túsýine baılanysty qala kóshelerine 300-den astam arnaıy tehnıka men 250-ge jýyq kommýnaldyq qyzmetkerler jumyldyryldy. Negizgi nazar mańyzdy magıstraldyq kóshelerdi, aıaldama pavılondaryn, trotýarlar men jaıaý júrginshiler ótkelderin tazalaýǵa aýdarylǵan. Bul — kólik qozǵalysy men turǵyndardyń qaýipsizdigin qamtamasyz etý maqsatynda jasalyp otyr. Qar qala syrtyna shyǵarylady, al joldyń júrý bóligi men trotýarlar kóktaıǵaqqa qarsy materıaldarmen óńdelý ústinde, — dep habarlady Pavlodar qalalyq ákimdiginen.
Buǵan deıin «Óskemen — Rahman qaınary» avtojolynda kólik qozǵalysyna shekteý qoıylǵany týraly jazǵanbyz.