Kóktaıǵaq saldarynan Aqtóbe oblysynda joldar jabyldy
AQTÓBE. QazAqparat – Aýa raıy nasharlap ketýine baılanysty búgin Aqtóbe oblysynda birqatar joldar jabyldy, dep habarlaıdy QazAqparat TJD-ne silteme jasap.
TJD baspasóz qyzmetiniń ókili Sábına Serikovanyń aıtýynsha, 27 jeltoqsan 1:30-dan bastap kóktaıǵaq bolýyna baılanysty oblystyq mańyzy bar Aqtóbe-Bolgarka-Shubarqudyq, sonymen qatar Shubarqudyq-Oıyl-Qobda-sol-Iletsk baǵytyndaǵy joldar jabylǵan.
4:20-dan bastap jaýyn-shashyn men kóktaıǵaqqa baılanysty respýblıkalyq mańyzy bar Samara-Shymkent tasjolynyń 718 km-den 526 km-ge deıingi aralyǵy, sonymen qatar Aqtóbe qalasynan Batys Qazaqstan oblysy shekarasyna deıingi joldyń 773 kılometrden 965 kılometrge deıingi bóligi, Belogarka aýylynan Qarabutaq aýylyna deıingi joldar jabyq.
4:20-dan bastap Aqtóbe-Atyraý-Astrahan tasjolynyń 11-den 92-kılomerge deıingi bóligi, Aqtóbe qalasynan Qandyaǵash qalasyna deıingi joldardaǵy kólik qatynasy toqtatyldy.
5:00-den bastap Qandyaǵash-Embi-Shalqar-Yrǵyz tasjolynyń 0-den 257 kılomerge deıingi aralyǵy, ıaǵnı, Qandyaǵash qalasynan Shalqarǵa deıingi baǵyt jabyq.
5:30-dan bastap Aqtóbe-Mártók-Orenbýrg tasjolynyń 14-99 kılometr aralyǵynda jol, ıaǵnı, Quralaıly aýylynan Reseı Federatsııasy shekarasyna deıingi aralyq jabyq.
Sonymen qatar, tańǵy 5:30-dan Aqtóbeniń soltústik aınalmasy jolyndaǵy kólik qozǵalysy toqtatyldy.
