Kóktaıǵaq: Pavlodarda 150-den astam adam jaraqat alǵan

PAVLODAR. KAZINFORM - Oblys ortalyǵyndaǵy jaraqat bólimshesine kúnine 60 adam júginedi. Olardyń teń jartysy – kóktaıǵaqtan zardap shekkender.

Apta ortasynda jaýǵan jańbyrdyń sońy aıazǵa ulasyp, Pavlodardyń kóshelerin kók muz basty. Saldarynan qalada jaltyr muzda taıyp jyǵylyp, jaraqat alyp jatqandar sany arta túsken.
№2 qalalyq aýrýhananyń jaraqat bólimshesine táýligine shamamen 60 adam júginedi. Onyń teń jartysy kóktaıǵaqqa baılanysty. Sońǵy bes táýlikte jalpy sany 150 adam medıtsınalyq kómekke júgingen. Al keıingi eki kúnde 50-den astam adamda súıektiń synýy tirkelgen. Onyń altaýy aýrýhanaǵa jatqyzyldy.

- Kóp jaǵdaıda adamdar tobyq súıeginiń, qol súıeginiń synýymen jáne býyn jaraqattarymen keledi. Barlyǵy derlik kóshede taıyp qulaǵandar. Qabyldaýǵa kelgen kezde tekserý júrgiziledi. Eger súıek synýy anyqtalsa, naýqas aýrýhanaǵa jatqyzylady. Qajetti em-dom kórsetiledi. Máselen eki kún buryn 1990 jyly týǵan qyz Almaty qalasynan týystaryna qonaqqa kelgen. Kóshede taıyp qulap, eki tobyǵyn syndyrǵan, - deıdi Pavlodar qalalyq №1 aýrýhanasynyń travmatolog-ortoped dárigeri Dáýren Smaǵulov.

Eske sala keteıik, Óskemende kóktaıǵaq saldarynan júzdegen kólik qaladan shyǵa almaı qaldy.