Oral kóshelerinde búgin júrýdiń ózi muń boldy - fotoreportaj
ORAL. KAZINFORM – Oral qalasynda 13 aqpanda jaýǵan jańbyrdan keıin kóshelerdi kók muz basyp, qolaısyz jaǵdaı qalyptasty.
Tańmen qoǵamdyq kólikter júrmegendikten, turǵyndardyń qatynaýy qıyndap ketti. Taksı baǵasy sharyqtap shyǵa kelse, keı turǵyndar kóshede konkımen júrgen sýreti men vıdeosyn áleýmettik jelige júktep jatty.
Bul kúni qala mektepteriniń oqýshylary onlaın oqydy.
BQO tótenshe jaǵdaılar departamentiniń málimetine qaraǵanda, mundaı jaǵdaı oblysqa tán bolyp, kóptegen baǵyttarda joldar jabyldy.
BQO densaýlyq saqtaý basqarmasynyń baspasóz qyzmetinen málim etkenindeı, 13 aqpan kúni saǵat 08.00-den 14.00-ge deıin óńirdegi medıtsınalyq uıymdardyń travmatologııalyq pýnktterinde túrli jaraqatpen 74 adam tústi.
Solardyń ishinde 5 adamǵa kúndizgi statsıonar, 40 patsıentke ambýlatorlyq em taǵaıyndaldy. 6 adam táýlik boıǵy statsıonarǵa jatqyzylsa, 23-i medıtsınalyq tekseristen ótýde.
Eske sala keteıik, budan buryn Batys Qazaqstanda aýa raıynyń nasharlaýyna baılanysty 7 jol ýchaskesi jabylǵanyn jazǵan bolatynbyz. Oralda kóktaıǵaqta muzǵa taıyp jyǵylǵan 156 adam dárigerge júgindi.
