Kóktaıǵaq kezindegi qaýipsizdik erejeleri qandaı

ÓSKEMEN. KAZINFORM — Shyǵys Qazaqstan oblysynyń qutqarýshylary turǵyndarǵa kóktaıǵaq kezindegi qaýipsizdik erejelerin túsindirdi. 

ShQO tótenshe jaǵdaılar departamenti baspasóz qyzmetiniń málimetine súıensek, kóktaıǵaq kezinde jaraqat alyp qalmaý úshin qaýipsizdik erejelerin saqtaý mańyzdy.

— Tabany qatty, syrǵymaıtyn aıaq kıimdi tańdańyz. Aýyr sómkelerdi ózińizben birge alyp júrmeńiz, sebebi tepe-teńdikti joǵaltyp qulap qalý qaýpi joǵary. Eger muz basqan jerdi aınalyp ótýge múmkindik bolmaı tursa, onda muz ústimen qysqa adymdar jasap, shańǵyshy sııaqty baıaý syrǵyp qozǵalyńyz, — delingen aqparatta. 

Qolyńyzdy qaltańyzǵa salyp júrmeńiz. Bul qulaǵan kezde jaraqat alý qaýpin arttyrady. 

— Eger syrǵanyp ketseńiz — sál otyryp, qolyńyzdaǵy barlyq nárseni tastańyz. Jolda telefonmen sóılesýden bas tartyńyz. Kóktaıǵaq ásirese baspaldaqta, jol jıekterinde asa qaýipti ekenin umytpańyz, — delingen habarlamada. 

Eske salsaq, osyǵan deıin Óskemende aqpannyń basynan 500-ge jýyq adam kóktaıǵaqtan zardap shekkeni habarlanǵan.