Kóktaıǵaq, qatty jel, naızaǵaı: 3 sáýirde aýa raıy kúrt qubylady
ASTANA. KAZINFORM — «Qazgıdromet» RMK sınoptıkteri 2026 jylǵy 3 sáýir, jumaǵa arnalǵan aýa raıy boljamyn jarııalady.
Mamandardyń málimetinshe, atmosferalyq fronttardyń ótýine baılanysty elimizdiń soltústik-batysy men ońtústiginde nóser jańbyr jaýyp, naızaǵaı oınaıdy, keı jerlerde burshaq túsip, daýyldy jel soǵady.
Al respýblıkanyń qalǵan bóliginde aýqymdy antıtsıklonnyń áserinen jaýyn-shashynsyz aýa raıy saqtalady.
Sonymen qatar, el aýmaǵynda tuman túsip, jel kúsheıedi, al soltústik óńirlerde kóktaıǵaq bolýy múmkin.
Sınoptıkterdiń eskertýinshe, Qyzylorda oblysynyń shyǵysynda, Túrkistan oblysynyń batysy men soltústiginde, Jambyl oblysynyń ortalyq aýdandarynda, Jetisý oblysynyń soltústigi men ońtústiginde, sondaı-aq Almaty oblysynda órt qaýpi joǵary deńgeıde saqtalady.
Buǵan deıin sáýir aıynyń basynda elimizdiń soltústiginde, shyǵysynda jáne ońtústik-shyǵysynda jaýyn-shashynsyz, jyly kóktemgi aýa raıy saqtalatynyn jazdyq. Al batys óńirlerge ońtústik tsıklon áser etip, turaqsyz aýa raıyn qalyptastyrady.
