Kóktaıǵaq: Qaraǵandy oblysynyń joldaryna 150 polıtseı tartyldy

QARAǴANDY. KAZINFORM — Aýa raıynyń kúrt nasharlaýyna baılanysty óńirdegi jol-kólik ahýaly erekshe baqylaýǵa alyndy. Jol-kólik oqıǵalarynyń aldyn alý jáne qaýipti ýchaskelerge jedel den qoıý maqsatynda quqyq qorǵaý organdary patrýldeý jumystaryn kúsheıtti.

Jańbyr jaýyp, kóktaıǵaq bolýyna baılanysty Qaraǵandy oblysy Polıtsııa departamentiniń patrýldik polıtsııa batalonynyń jeke quramy kúsheıtilgen qyzmet rejımine aýystyryldy.

Polıtsııa qyzmetkerleri táýlik boıy kezekshilik atqaryp, oblys aýmaǵyndaǵy avtomobıl joldarynyń jaǵdaıyn úzdiksiz baqylaýda ustap otyr.

Jol qozǵalysy qaýipsizdigin qamtamasyz etýge 70 patrýldik ekıpaj jáne shamamen 150 polıtsııa qyzmetkeri tartylǵan. Olar joldaǵy jaǵdaıdy baqylap, qozǵalysqa qatysýshylardy qaýipti ýchaskeler jóninde aldyn ala eskertedi, sondaı-aq qajetti jaǵdaıda júrgizýshiler men jaıaý júrginshilerge kómek kórsetedi.

Anyqtalǵan problemalyq jol ýchaskeleri týraly málimetter tıisti sharalar qabyldaý jáne apattyq jaǵdaılardyń aldyn alý maqsatynda jedel túrde «QazAvtoJol» aktsıonerlik qoǵamyna joldanady.

Polıtsııa oblys turǵyndaryn jol qozǵalysy qaǵıdalaryn qatań saqtaýǵa, aýa raıy jaǵdaılaryn eskerýge, qaýipsiz qozǵalys jyldamdyǵyn tańdaýǵa jáne araqashyqtyqty ustanýǵa shaqyrady.

— Qolaısyz aýa raıy jaǵdaıynda jol qozǵalysyna qatysýshylardan barynsha muqııat bolý talap etiledi, — dedi Qaraǵandy oblysy Polıtsııa departamenti ákimshilik polıtsııa basqarmasynyń bastyǵy Baǵdat Kákimov.

Osyǵan deıin 10 aqpanda eldegi qaı joldarda qozǵalys shektelgeni týraly jazǵan edik.