Kóktaıǵaq bastaldy: júrgizýshilerge mańyzdy eskertý jasaldy
ASTANA. KAZINFORM — Kúnniń kúrt sýytýy men alǵashqy qar jol qozǵalysyn qıyndata bastady. Júrgizýshilerge QazAvtoJol kompanııasy kólikti qysqy maýsymǵa daıyndap, kóktaıǵaq kezinde jyldamdyqty tómendetý jáne qaýipsiz araqashyqtyq saqtaýdy eskertti.
— Alǵashqy qar jaýyp, joldarda kóktaıǵaq baıqala bastady. Osyndaı ýaqytta rólge otyrǵan árbir júrgizýshiden erekshe muqııattylyq pen sabyr qajet, — delingen habarlamada.
Qaýipsizdik — usaq-túıekten bastalady. Sondyqtan:
- Kóligińizdi qysqy dóńgelekke aýystyryńyz;
- Tejegish júıesin, jaryq pen akkýmýlıatordy tekserip shyǵyńyz;
- Qysqy otyndy paıdalanyp, antıfrız deńgeıin baqylańyz;
- Jolda jyldamdyqty shektep, araqashyqtyqty saqtańyz;
- Rólde asyǵys sheshim qabyldaýdan, kenet burylystardan aýlaq bolyńyz.
Bul — jaı ǵana keńes emes, ómirdi qorǵaýdyń qarapaıym qaǵıdasy. Qys mezgilinde joldaǵy ár qımyl, ár sheshim qaýipsiz sapardyń kepili.
— Qurmetti júrgizýshiler, ózińizdiń jáne ózgeniń amandyǵy — sizdiń qolyńyzda. Jol qyzmeti táýlik boıy jumys isteıdi. Al 1403 biryńǵaı baılanys ortalyǵy árdaıym baılanysta. Kez kelgen ýaqytta kómek qajet bolsa — biz árqashan qasyńyzdamyz, — dep eskertti jol kompanııasynan.
