Kóktaıǵaq, aıaz bolady: sınoptıkter aýa raıyna baılanysty eskertý jasady

ASTANA. KAZINFORM –  Elimizdiń birqatar oblysynda aýa raıynyń qolaısyzdyǵyna baılanysty daýyldy eskertý jarııalandy.

Qazgıdromet sınoptıkteriniń boljamy boıynsha, 19 qazan kúni elimizdiń basym bóliginde aýa raıy qubylmaly bolady: jel kúsheıip, tuman túsedi, kóktaıǵaq jáne aıaz bolady.

Astanada túnde jáne tańerteń tuman túsedi. Aýa temperatýrasy túnde -1…+1°S, kúndiz +7…+9°S bolady. Jeldiń jyldamdyǵy sekýndyna 12 metrge deıin jetedi.

Atyraý oblysynda jeldiń ekpini 20 m/s deıin kúsheıedi, óńirde órt qaýpi joǵary. Aqmola oblysynda túnde jáne tańerteń tuman bolady, jeldiń jyldamdyǵy 20 m/s deıin jetedi.

Jetisý, Pavlodar jáne Shyǵys Qazaqstan oblystarynda da jel turady.

Qyzylorda oblysynda túnde 1- 6°S deıin aıaz bolady. Mańǵystaý oblysynda jel 18 m/s, órt qaýpi joǵary. Qaraǵandy jáne Jambyl oblystarynda túngi ýaqytta tuman túsip, jel kúsheıedi.

Sınoptıkter turǵyndarǵa aýa raıy boljamyn muqııat qadaǵalap, kólik qozǵalysy kezinde saq bolýǵa keńes beredi.

Jel men kóktaıǵaq kezinde uzaq jolǵa shyqpaý, al aýyldyq jerlerde órt qaýipsizdigi erejelerin saqtaý mańyzdy ekeni eskertildi.

Aıta keteıik, Soltústik Qazaqstan oblysynda alǵashqy qar jaýyp, qolaısyz aýa raıyna baılanysty eskertý jarııalandy.