Kóktaıǵaq: almatylyq kólik júrgizýshilerge dóńgelekterdi aýystyrý usynyldy

Qalalyq kommýnaldyq ınfraqurylymdy damytý basqarmasy almatylyq kólik júrgizýshilerge birqatar keńes berdi, dep habarlaıdy Kazinform.

«Qazgıdromet» RMK boljamy boıynsha, 31 qazannan 1 qarashaǵa qaraǵan túni Almatyda qatty jańbyr jaýyp, arty silbi qarǵa ulasady. Túnde aýa temperatýrasy -3 gradýsqa deıin tómendeıdi, kóktaıǵaq bolady.

Osyǵan oraı qalalyq kommýnaldyq ınfraqurylymdy damytý basqarmasy almatylyq kólik júrgizýshilerge birqatar keńes berdi.

«Kommýnaldyq qyzmetterdiń kóktaıǵaqqa qarsy jumystardy jedel jáne sapaly júrgizýin qamtamasyz etý maqsatynda avtokólik ıelerinen múmkindiginshe qala boıynsha qozǵalysty shekteýdi suraımyz. Jolda kóktaıǵaqtyń ári qozǵalys bóliginde taıǵanaq qabyrshyqtardyń paıda bolýyna baılanysty júrgizýshiler qozǵalys jyldamdyǵyn tómendetip, avtomobılder arasyndaǵy qashyqtyqty arttyryp, búıirlik aralyqty saqtaýlary, kenetten manevrler men tejeýler jasaýdan aýlaq bolýlary tıis», - delingen habarlamada.

Basqarma málimetinshe, megapolıstiń ınfraqurylymyna 10 merdiger uıym, 818 birlik tehnıka jáne 1 240 jol jumysshysy tartyldy. 76 tonna kóktaıǵaqqa qarsy materıaldar daıyndaldy.

«Aǵymdaǵy jyly tehnıkany jańartý jáne eńbekti mehanıkalandyrý maqsatynda 101 birlik tehnıka satyp alyndy. Barlyq tehnıka ámbebap. Qysta da, jazda da qoldanylady»,- dep atap ótti Almaty qalasynyń kommýnaldyq ınfraqurylymdy damytý basqarmasynan.