Kóktal aýylynyń turǵyndary jańa nysannyń salynýyna qarsy - Almaty oblysy
TALDYQORǴAN.QazAqparat - Taldyqorǵan qalasyna qarasty Kóktal aýylynyń halqy jańa nysannyń salynýyna qarsy. Kóktal aýylynyń ońtústiginde qıyrshyq tas shyǵaratyn zaýyt bar.
Al shyǵysynda sút shyǵaratyn zaýyt. Biriniń tarsyldaǵan daýysynan, ekinshisinen shyǵatyn borsyǵan ıisten halyq mezi bolǵandaryn aıtady, dep habarlaıdy QazAqparat tilshisi.
Endi jańadan salynatyn nysan tipten júrip-turýymyzdy shekteıdi, deıdi kóktaldyqtar. Qazirdiń ózinde jerdi qorshaýǵa alǵan ıesi olardyń buǵan deıin júrgen joldaryn japqan. Al turǵyndar jańadan salynatyn nysannyń astynda sý qubyry jatqanyn aıtady. Tipti buǵan deıin arasy alshaq ornalasqan joǵary voltti elektr baǵanalaryn bir-birine jaqyndatyp tastady, deıdi.
"Men ózim elektr jelileriniń mamanymyn. Joǵary voltti elektr baǵanalarynyń arasy qazir eki-aq metr. Buǵan deıin olardyń ara qashyqtyǵy keminde 15 metrdeı bolǵan. Buny osynshama jaqyndatyp tastaýǵa kim ruqsat berdi? Janynda úıler tur. Erteń jel soǵyp qulasa, bizdiń qaýipsizdigimizge kim jaýap beredi? Qorshaýǵa alynǵan jerdiń astynda sý qubyry jatyr. Erteń apat bolsa, ne isteımiz? Tipti bizge bul jerde ne salynatynyn eshkim anyqtap aıtpady", deıdi Kóktal aýylynyń turǵyny Bekbatyr Núrpeıisov.
Al ákimdiktegiler jańadan qorshaýǵa alynǵan aımaqta keńse jáne temir-beton shyǵaratyn zaýyt salynatyn aıtty. Nysan eki jyl ishinde salynyp aıaqtalýy tıis. Biraq, ákimdiktegiler halyqtyń narazylyǵyn buǵan deıin estimedik dep otyr.
"Osy kúnge deıin eshqandaı bir adam ákimshilikke kelip, aryz-shaǵymmen júgingen emes. Jańa nysannyń salynýyna halyqtyń qarsylyq bildirip jatqanyn birinshi ret estip turmyn. Endi osyndaı týyndap jatsa, biz árıne komıssııamen shyǵamyz. Qalalyq mekemelermen birge shyǵyp, tekserý jumystaryn júrgizemiz. Qalypqa keltiremiz", deıdi Taldyqorǵan qalasyna qarasty Erkin aýyldyq okrýgi ákiminiń mindetin atqarýshy Qanat Rysbekov.
Sondaı-aq halyq, sút ónimderin shyǵaratyn zaýyttan shyǵyp jatqan qaldyq sýdyń borsyǵan ıisinen de sharshaǵandaryn aıtady. Alaıda, ákimdiktegiler bul jaıttan da habarsyz bolyp shyqty. Tekseremiz dep shekteldi.
