«Kóktal-1» shaǵynaýdanynda apat tolyq joıylyp, gaz berildi - elorda ákimdigi

ASTANA. QazAqparat – Astanadaǵy «Kóktal-1» shaǵynaýdanynda apat saldary joıylyp, barlyq abonentke gaz berý qalpyna keltirildi, dep habarlaıdy QazAqparat qala ákimdiginiń resmı saıtyna silteme jasap.

«Saǵat 17:00-degi jaǵdaı boıynsha «Kóktal-1» turǵyn alabynyń barlyq abonentterine gaz berý tolyq qalpyna keltirildi.

«QazTransGaz Aımaq» AQ avarııalyq brıgadasy jóndeý-qalpyna keltirý jumystaryn aıaqtady. Barlyq úsh gaz rettegish pýnkter shkaftary shtattyq rejımde jumys istep tur», - delingen usynylǵan málimette.

Búgin tańerteńgi saǵat 9.00-den №15 jáne №16 taratý pýnkterine jalǵanǵan abonentterge gaz berile bastady. Al úshinshi gaz taratý pýnktine jalǵanǵan 75 abonentke jyljymaly bý agregaty qyzmet kórsetedi. «Saryarqa» aýdany ákimdiginiń apparatynda osy másele boıynsha shtab quryldy. Aýdan ákimdigi gazsyz qalǵan úılerge kómir jetkizýdi uıymdastyryp jatyr», - delingen edi málimette.

Eske salsaq, keshe keshke atalǵan shaǵynaýdanda qurylys tehnıkasynyń kesirinen 236 abonent gazsyz qalǵan bolatyn.