Kóksý qant zaýytynyń óńdeý qýaty táýligine 3 myń tonnaǵa deıin artady
ASTANA. KAZINFORM - Qazaqstanda qant qyzylshasyn jınaý naýqanyna jáne odan keıingi óńdeý maýsymyna daıyndyq jumystary júrip jatyr. Osy saladaǵy belgili kásiporyndardyń biri – Kóksý qant zaýytynda jańa ónimdi qabyldaýǵa daıyndyq jumystary aıaqtalýǵa jaqyn.
QR Aýyl sharýashylyǵy mınıstrligi baspasóz qymetiniń habarlaýynsha, qazirgi tańda kásiporynnyń óńdeý qýaty táýligine 2 myń tonna. Jańǵyrtý jumystarynyń arqasynda bul kórsetkish bıylǵy qazanda táýligine 3 myń tonnaǵa deıin ulǵaıtylady dep josparlanyp otyr.
Qyrkúıek aıynyń sońynda kásiporynda jańadan ornatylǵan dıffýzııalyq jabdyqty montajdaý jumystary aıaqtalady.
Sonymen qatar óndiristik zerthanany jańa qural-jabdyqtarmen jaraqtandyrý jumystary júrgizilý ústinde. Qant qyzylshasynyń qospalylyǵyn jáne qanttylyǵyn anyqtaýǵa arnalǵan jańa qurylǵy qoıyldy.
Shıkizat qabyldaý úshin kásiporyn aýmaǵynda bes BÝM mashınasy ázir tur. Daıyndyq jumystarynyń bekitilgen kestege sáıkes sapaly qolǵa alynyp jatqany jańa ónimdi ýaqtyly qabyldap, óńdeý kezeńinde kásiporynnyń úzdiksiz jumysyn qamtamasyz etýdiń kepili.
Aýyl sharýashylyǵy mınıstrligi zaýyttardy qant qyzylshasyn óńdeý maýsymyna daıyndaý jumystaryn úılestirýdi jan-jaqty qolǵa alyp otyr. Atap aıtqanda, qazan aıynda Taraz qant zaýytynda táýligine 3 myń tonna ónim óńdeıtin jeli ornatý jumystary aıaqtalady.
Sonymen qatar mınıstrlik qant qyzylshasy egiletin alqaptardyń kólemin ulǵaıtý boıynsha jumysty jalǵastyryp jatyr.
-Bıyl qant qyzylshasy 23,8 myń gektar alqapqa egildi. Negizgi egis alqaptary Jambyl oblysy men Jetisý oblysynda shoǵyrlanǵan. Atalǵan sharalardy iske asyrý óndiris kólemin ulǵaıtýǵa jáne otandyq óńdeý kásiporyndarynyń óndiristik qýatyn tıimdi paıdalanýǵa baǵyttalǵan,-delingen habarlamada.
Osyǵan deıin qant naryǵynyń 70%-dan astamy ımportqa táýeldi ekeni týraly jazdyq.
