Kókshetaýlyqtyń «IronMan» kostıýmderine kóptegen elderden tapsyrys túsedi
KÓKShETAÝ. QazAqparat - 26 jastaǵy Aleksıı Odtyń jasaıtyn dúnıesin hobbı dep ataýǵa kelmeıdi. Sebebi, ol 14 «IronMan» kostıýmderin jasap shyǵarǵan. Kókshetaýlyq sheber «QazAqparat» HAA tilshisine óziniń erekshe kásibi týraly aıtyp berdi.
«Men 9-synyptan keıin radıomehanıka lıtseıine bardym. Mýzykalyq ýchılışede, shashtarazda da oqydym. Osy ýaqyt ishinde mýzykamen aınalystym. Toptarda oınap, án jazdym. Óz isimdi tapqanǵa deıin solaı boldy», - dedi Aleksıı.
Onyń Temir adamdy jasaýyna fılmder men jan qalaýy yqpal etken.
«Men árdaıym sýperqaharmandar týraly kınolardy jaqsy kóretinmin. 4 jyl buryn «Temir adam» kınosyn kórip, Tonı Starktiń kostıýmin jasaǵym keldi. Men ol kezde jarnama agenttiginde jumys isteıtinmin. Sol kezde Jeliden osyndaımen aınalysatyn Kýrskide turatyn jigittiń vıdeolaryn kórip, dýlyǵa jasadym. Sodan bastap bul is meniń hobbıime, al qazir negizgi jáne súıikti isime aınaldy», - dedi Aleksıı.
Sheber jigit alǵashqyda ózi úshin kostıým jasamaqshy bolǵan.
«Alǵashqy kostıýmdi jaz boıy jasadym. Jumystan keıin tek sonymen aınalysyp júrdim. Ony aıaqtaǵannan keıin «bul maǵan ne úshin kerek?» degen oı keldi. Sosyn Ýkraınada turatyn adamǵa satyp jiberdim. Keıin plastıkten eki Temir adam kostıýmin jasaýǵa tapsyrys tústi. Ony jasaýǵa jarty jyl ýaqyt ketti, dosym ekeýmiz qanshama kúsh jumsadyq! Qazir kostıýmderdi jasaýǵa bir jarym aı ýaqyt jumsaımyn. Bul is maǵan paıda emes, kerisinshe shyǵynǵa batyrdy. Biraq jaqsy ómirlik sabaq boldy», - deıdi ol.
Sýperqaharmandardyń kostıýmin jasaý úlken suranysqa ıe bolǵan. Sheberge álemniń barlyq túkpir-túkpirinen tapsyrystar túsýde. Aleksııdiń jasaǵan temir adamdaryn Reseı, Bolgarııa, Úndistannan kórýge bolady. Taǵy birneshe kostıýmderi Astana men Almatyǵa jóneltilgen.
«EKSPO úshin de kostıýmder jasadym. Temir adam kók-sary túste shyqty jáne EKSPO degen jazýy boldy», - dep bólisti Aleksıı.
«1 maýsymda qala ortalyǵyna shyǵyp, Temir adamdy barshaǵa kórsetkim keledi. Árkim óz isin súıýi kerek, oǵan baryn salsa ǵana, ol barshaǵa baqyt ákeledi. Nemen aınalysatynyń mańyzdy emes, bastysy - ony mahabbatpen jasa!», - dep túıindedi Aleksıı.
