Kókshetaýlyqtar jergilikti ónimdi deldalsyz satyp alatyn boldy
KÓKShETAÝ. QazAqparat – QR Tuńǵysh Prezıdenti kúnine oraı Aqmola oblysynyń ákimi Ermek Marjyqpaevtyń qoldaýymen Kókshetaý qalasynda eki áleýmettik pavılon ashyldy, dep habarlaıdy QazAqparat tilshisi.
«Kokshe» áleýmettik kásipkerlik korporatsııasynyń málimetinshe, qazirgi zamanǵy stılde salynǵan áleýmettik pavılondardan oblys ortalyǵynyń turǵyndary deldalsyz jergilikti ónimdi satyp ala alatyn múmkindik týyp otyr. Atalmysh saýda oryndarynda «Bıjan», «Gormolzavod», «Aına saýda úıi», «Kókshetaý nan zaýyty», «Kýrochka Rıaba», «Aqsaı nan» tárizdi aqmolalyq taýar óndirýshilerdiń azyq-túlik ónimderi qoıylǵan.
«Jańa pavılondarda qala turǵyndary Aqmola oblysynyń turaqtandyrý qoryndaǵy ónimderdi ıaǵnı un, kúrish, maı, qant tárizdi ónimderdi arzan baǵaǵa satyp ala alady», - deıdi vedomstvodan.
Aıta ketıik, óńirde «Kokshe Market» pavılon jelisin odan ári keńeıtý josparda bar. Bul jolǵy eki pavılonnyń bireýi Tsentralnyı shaǵyn aýdany 32 mekenjaıynan oryn tepse, ekinshisi Vasılkovka shaǵyn aýdanyndaǵy №17 orta mektep mańynan ashylyp otyr.
