Kókshetaýlyqtar jádiger zattardy mýzeıge syılaı alady
KÓKShETAÝ. QazAqparat – QR Táýelsizdiginiń 30 jyldyǵy aıasynda Kókshetaý qalasynyń tarıh mýzeıi oblys ortalyǵynyń turǵyndaryna «Mýzeıge jádiger syıla» atty kórmege qatysýǵa shaqyrdy, dep habarlaıdy QazAqparat.
Eski magnıtofondar, kirpish telefondar, dısketa, kasseta, tetrıster, tipti qaǵaz tıyndar... Munyń bári 90-2000 jyldardyń basynda ómirimizdiń bir bóligi boldy. Mine, endi kókshetaýlyqtar osyndaı zattardyń «shańyn silkip», olardy Kókshetaý qalasynyń tarıh mýzeıine tapsyra alady. Umytylǵan jáne qajetsiz zattar endi jeke otbasynyń ǵana emes, búkil oblys ortalyǵy tarıhynyń bir bóligine aınalady.
«Biz QR Táýelsizdiginiń 30 jyldyǵyna birqatar is-shara daıyndadyq. Bulardyń aldy qańtar aıynda jarııalanǵan «Mýzeıge jádiger syıla» aktsııasy boldy. BAQ arqyly biz qala turǵyndaryna osy tarıhı kezeńmen baılanysty barlyq nárseni mýzeıge tapsyrýǵa bolatynyn jarııaladyq. Bul kezeń – 90-shy jáne 2000 jyldar aralyǵy.
Ol ýaqyttarda ár adamnyń ómirinde jańa zattar paıda boldy, biz solar arqyly Táýelsizdik tarıhyn aıtqymyz keldi. Bul – beınemagnıtofon, teledıdar, uıaly baılanys... Mýzeı bul zattardy bolashaq urpaqqa saqtap, qalada jańa zaman tarıhynyń qalaı bastalǵanyn kórsetedi», – dedi Kókshetaý qalasy Tarıh mýzeıiniń dırektory Botagóz Ǵabdýllına.
Búgingi tańda kórme eksponattarmen tolyǵa bastady. Olardyń arasynda qyzyqtylary da bar. Mysaly, jedel fotosýret jasaıtyn Polaroid kamerasy, uıaly telefondardyń alǵashqy úlgileri, «sabyn» kameralar, beınemagnıtofon. Oblys ortalyǵyndaǵy jeke gazetterdiń alǵashqy nómirleri de sol kezde paıda bolǵan.
«Kókshetaý turǵyndarynan aktsııaǵa qosylýdy jáne 90-shy jáne 2000 jyldary ómirińizde paıda bolǵan jáne áli kúnge deıin saqtalǵan zattardy mýzeıge tapsyrýlaryn suraımyz. Eger otbasylyq albomdaryńyzda sol kezdegi qala kórinisteri bar sýretter bolsa, olarmen de bólisýdi suraımyz», – dedi Kókshetaý qalasy Tarıh murajaıy qorlary bóliminiń ǵylymı qyzmetkeri Olga Sartova.
Mýzeı qyzmetkerleriniń aıtýynsha, olardyń kórmesinde tetrıs, oıyn konsolderi, tamagochı jáne sol kezdegi kıimder jetispeıdi. Eger osynyń bári murajaıǵa tússe, birden birneshe ekspozıtsııa jasap, tipti kezekti «Mýzeıdegi túndi» osy tarıhı kezeńge arnaýǵa bolady. «90-shy jáne 2000 jyldary bolǵan oqıǵalardy umytpaýymyz kerek, Qazaqstannyń qandaı kezeńderden ótkenin, ómirimizde qandaı dúnıeler bolǵanyn kórsetýimiz kerek. Olar kóptegen qyzyqty nárselerdi aıta alady», – dep tolyqtyrdy óz sózin B. Ǵabdýllına.
