Kókshetaýlyqtar Maslenıtsa merekesin atap ótti
KÓKShETAÝ. QazAqparat - Kókshetaýda «Aqmola oblysynyń orys qaýymdastyǵy» qoǵamdyq birlestiginiń uıymdastyrýymen slavıan halyqtarynyń merekesi - Maslenıtsa atap ótildi, dep habarlaıdy QazAqparat tilshisi.
Atalmysh meıram bir jaǵynan qyspen qoshtasatyn, shýaqty kóktemdi qarsy alatyn kún retinde toılansa, sonymen qatar, ókpeli adamdardy bir-birimen tatýlastyryp, adamdardy jasaǵan qatelikteri úshin keshirim suraýǵa úndeıtin kún.
Bul joly Dostyq úıiniń alańynda uıymdastyrylǵan merekelik sharaǵa qoǵamdyq birlestiktiń aýdandardaǵy fılıaldary da ún qosty. Jergilikti shyǵarmashylyq ujymdar men halyqtyq folklorlyq ansamblder alańǵa jınalǵan jurtshylyqqa kóterińki kóńil-kúı syılady.
Ásem án de, ulttyq kıimdermen jasanǵan kórkemónerpazdardyń myń buralǵan bıleri de bul kúnniń shyraıyn keltire tústi. Sondaı-aq, arnaıy qurylǵan pavılondarda táttiler men qolóner týyndylary satyldy.
Al, Maslenıtsa merekesiniń dástúrli taǵamy quımaq turǵyndarǵa tegin taratyldy. Sheńber pishindes quımaq kún beınesin keskindep, kóktem men jylylyqtyń sımvolyn, merekeniń buljymas belgisin aıshyqtap turǵandaı kórindi. Sporttyq oıyndar uıymdastyrylyp, qýyrshaqty jaǵý rásimin de kópshilik qyzyǵa tamashalady.
