Kókshetaýlyqtar Qazaqstan týraly reseılik kınorejısserdiń fılmin tamashalady
«Dostar» mádenıet saraıynda usynylǵan derekti fılmde Táýelsiz Qazaqstannyń qalyptasý kezeńi, damý, gúldený protsesi kórinis tapqan. Ásirese, Elbasy Nursultan Nazarbaevtyń el ómirindegi eleýli eńbekteri jan-jaqty qamtylǵan. Fılm KSRO-nyń sońǵy ári tuńǵysh prezıdenti Mıhaıl Gorbachevtiń keńestik ımperııa kúırep, onyń ornyna táýelsiz 15 memleket qurylýyna jáne olardyń odan ary damýdyń dańǵyl jolyna túsip, ózge eldermen terezesi teń memleket bolyp el bolyp qalyptasýy sátimen bastalady. Halqymyzdyń qasiretine aınalǵan uzaq jyldar boıy alapat jarylys bolyp, ıadrolyq qarý synaqtan ótkizilip kelgen Semeı polıgonynyń jabylýy, Táýelsiz Qazaq elin qalaı qurǵany, Ystanbul sammıtinen keıin 11 jyl boıy toqyraýǵa ushyraǵan Eýropadaǵy qaýipsizdik jáne yntymaqtastyq uıymynyń tarıhyn sammıtin elorda tórinde ótkizgendigi, Reseı men Ýkraına arasyndaǵy daǵdarys, Armenııa men Ázerbaıjan shıelenisi, halqy bosqynǵa aınalǵan Sırııadaǵy qandy soǵysty retteý isine qalaı aralasqany jan-jaqty baıandalady.
Qazaqstannyń Reseı jáne Qytaı Halyq Respýblıkasymen aradaǵy shekara máselesiniń sheshý sátteri de alynǵan. Elbasy fılmde Qytaı basshylyǵymen daýly aımaqtarǵa qatysty máselelerdi qalaı ońtaıly sheshe alǵandyǵyna erekshe toqtalady.
Sonymen qatar fılmde Reseı, Qytaı, Japonııa, Aýstrııa, Belgııa, Ulybrıtanııa, Germanııa, Gollandııa, Izraıl, Ispanııa, Frantsııa, Italııa jáne Shveıtsarııanyń dıplomatııalyq mıssııalarynyń kóshbasshylary men ókilderiniń pikirleri de berilgen. Týyndy da Astananyń qurylýy týraly Elbasy Nursultan Nazarbaev, Qazaqstan Respýblıkasy Prezıdenti Ákimshiliginiń basshysy Ádilbek Jaqsybekov jáne elordanyń qazirgi ákimi Áset Isekeshov keńinen baıandaıdy.
Kórermenderdiń zor qyzyǵýshylyǵyn týǵyzǵan fılmdi oblys ákiminiń orynbasarlary Asqarbek Úısinbaev pen Qanat Ydyrysov, memlekettik organdardyń ókilderi, oblystyq, qalalyq máslıhat depýtattary, áleýmettik sala, oqý oryndary, shaǵyn jáne orta bızness ókilderi soǵys jáne eńbek ardagerleri, jastar, saıası partııa fılıaldary, ulttyq-mádenı ortalyqtar, dinı konfessııalar, qoǵamdyq birlestikter ókilderi tamashalady.
Táýelsizdiktiń tutqasyn nyǵaıtý jolyndaǵy eren eńbektiń jemisin aıǵaqtaǵan fılm jaıly qoǵam qaıratkeri, óńirdi damytýǵa eleýli eńbek sińirgen zeınetker Qymbat Mustafına óziniń jyly lebizin bildirdi.
«Elimizdiń atyn shyǵaryp, órkendep damýy úshin osyndaı taǵylymdy derekti fılmderdiń bereri mol. Patrıottyq, otansúıgishtik sezimmen beınelengen kórinister adamnyń janyna jaıly áser etip, jylylyq syılaıdy. Elbasynyń arqasynda Qazaqstanda búkil álem tanyp otyr. Batystyń myqty saıasatkerleriniń ózi Nursultan Ábishulynyń naǵyz kóshbasshy ekenin moıyndap otyr», - deıdi Qymbat Mustafına.
