Kókshetaýlyqtar áskerı qaqtyǵysta sheıit bolǵandardy eske aldy
KÓKShETAÝ. QazAqparat – Kókshetaýda Qazaqstan áskeriniń tájik-aýǵan shekarasynan shyǵarylǵanyna 19 jyl tolýyna oraı, 1993-2001 jyldary tájik-aýǵan shekarasynda áskerı boryshyn ótegen aqmolalyq jaýyngerlerdiń qatysýymen soǵysta sheıit bolǵandardy eske alý aktsııasy ótti, dep habarlaıdy QazAqparat tilshisi.
Oblystyq ishki saıasat basqarmasy uıytqy bolǵan sharaǵa Aqmola oblystyq ardagerler keńesiniń músheleri, 1993-2001 jyldary tájik-aýǵan shekarasynda áskerı boryshyn ótegen aqmolalyq jaýyngerler, belsendi jastar men BAQ ókilderi qatysty.
Shara «Máńgilik alaýǵa» gúl shoǵyn qoıý rásiminen bastaldy.
Aktsııaǵa jınalǵandar aldynda sóz sóılegen Aqmola oblystyq ishki saıasat basqarmasy basshysynyń orynbasary Narıman Ábdirahmanov, Aqmola oblystyq ardagerler keńesiniń tóraǵasy Ǵosman Tóleǵul, Kókshetaý qalalyq «Tájik-aýǵan shekarasynda áskerı qaqtyǵystarǵa qatysýshylar» ardagerler odaǵynyń tóraǵasy Qaıdar Bákirov sharanyń mańyzdylyǵyna toqtala kele, alda kele jatqan Jeńistiń 75 jyldyǵymen quttyqtady.
«Jaýyngerler TMD shekarasynyń ońtústik shebin, Aýǵanstanmen shektesetin eń aýyr jáne qıyn ýchaskeniń tynyshtyǵyn kúzetti. Olardyń basty maqsaty - jalpy saıası jaǵdaıdyń turaqtanýyna deıin, tájik-aýǵan shekarasyndaǵy ahýaldy retke keltirý. Sonymen qatar gýmanıtarlyq kómek taýarlarynyń jetkizilimin qamtamasyz etý jáne qorǵaý, bosqyndardyń qaýipsiz jetýin qadaǵalaý, mańyzdy nysandardy qorǵaý boldy», - dedi Kókshetaý qalalyq «Tájik-aýǵan shekarasynda áskerı qaqtyǵystarǵa qatysýshylar» ardagerler odaǵynyń tóraǵasy Qaıdar Bákirov.
Sonymen qatar, ol Kókshetaýda tájik-aýǵan shekarasynda qaza bolǵan jaýyngerlerge arnalǵan eskertkish ornatylatynyn atap ótti.
Aıta keteıik, 1993 jyly TMD memleket basshylary Tájikstan eliniń Aýǵanstanmen shektesetin qorǵaýsyz qalǵan shekarasyna ásker jiberý týraly sheshim qabyldaǵan bolatyn. Elbasynyń usynysymen QR Qorǵanys mınıstrliginiń 500 sarbazy, sonymen qatar UQK Shekara qyzmetiniń jáne ІІM-niń qyzmetkerleri TMD-niń syrtqy shekarasynyń kúzetin kúsheıtýge attandyrylady.
Sol mıssııada memlekettik múddeni alǵa qoıyp, shekara tynyshtyǵyn kúzetken TMD áskeri 356 jaýyngerinen aıyryldy. Sonyń ishinde 54-i qazaqstandyq áskerı qyzmetshiler. Qazaq jaýyngerleri 8 jyldan keıin 2001 jyly 8 aqpan kúni elge oraldy.
Eń joıqyn qaqtyǵys 1995 jyly Pamır taýlaryndaǵy Pshıhavr shatqalynda oryn aldy. Onda sodyrlarmen bolǵan atysta 17 qazaq jigiti kóz jumǵan bolatyn. Qazirgi kezde olardyń erligi elenip, eldiń árbir óńirinde eskertkishter, mektepter men alleıalar boı kóterýde.
