Kókshetaýlyq jastar qarııalar men múgedekterge qaıyrymdylyq kómegin kórsetýde
KÓKShETAÝ. QazAqparat - "Jas Otan" jastar qanatynyń Aqmola oblystyq fılıalynyń "Eriktiler mektebi" jáne "Jas saıasatkerler" klýbynyń belsendileri zeınetkerler men múgedekterge arnalǵan "Ardagerlerdi ardaqtaıyq" atty jobany júzege asyrýda.
Onyń aıasynda zeınetker jáne múgedek Alma Júsipovanyń otbasysyna da qaıyrymdylyq kómegi kórsetildi.
"Bizdiń kómegimizge muqtaj jandar jaıly "Keńes ortalyǵy" arqyly bilemiz. Osynda zeınetker jáne múgedek Alma Júsipovanyń úıine jóndeý jumystary qajet ekenin estip bildik. Dereý alty adamnan turatyn "Jas Otan" JQ belsendilerin jınap, birer saǵattyń ishinde qarııaǵa kómek kórsettik", - deıdi eriktiler mektebiniń úılestirýshisi Sultanbek Bekeshev.
Sonymen qatar bul kúni "jasotandyqtar" zeınetkerge qysqa otyn ázirleýge de kómek qolyn sozdy.
"Osynshama balalardyń kelgenine tań qalyp, kóńilim bosap qaldy. Jastar barlyq jumysty uqypty,taza ári jyldam istep berdi. Men sııaqty zeınetkerge kómek kórsetip júrgen osyndaı balalardy tárbıelegen ata-analaryna alǵysym sheksiz", - deıdi Alma Júsipova.
