Kókshetaýlyq zaýyt óz bazasynda medıtsınalyq maska shyǵarýǵa daıyn
KÓKShETAÝ. QazAqparat - Kókshetaýdaǵy «Tynys» zaýytynda medıtsınalyq maska shyǵarý máselesi qarastyrylýda. Shıkizat bolsa, zaýyt basshylyǵy maska óndirisine kirisýge daıyn. Bul týraly aımaq basshysynyń orynbasary Aına Mysyrálimovanyń qatysýymen ótken brıfıngte aıtyldy, dep habarlaıdy QazAqparat tilshisi.
Brıfıngte Aqmola oblystyq Densaýlyq saqtaý basqarmasynyń basshysy Súlen Іlııasov koronavırýs ınfektsııasynyń taralýynyń aldyn alý sharalary týraly baıandady. Atap ótilgendeı, medıtsınalyq maskalardyń tapshylyǵy Qazaqstanda ǵana emes, shet memleketterde de bar. Zaýyttar suranysty qanaǵattandyryp úlgere almaýda. Bul másele Úkimettiń nazarynda. Qazirgi kezde elimizde maskalardy qosymsha shyǵaratyn tórt zaýyt jumys isteýde. Maska óndirisin Aqmola oblysynda da qolǵa alý josparlanǵan.
«Búgingi tańda oblystaǵy aýrýhanalarda 144 myń dana maska qory bar, qoımada qosymsha 58 myń maska saqtalǵan. Qazirgi kezde oblys ortalyǵyndaǵy «Tynys» AQ bazasynda medıtsınalyq maska shyǵarý máselesi qarastyrylýda. Shıkizat bolsa, zaýyt basshylyǵy maska óndirisine kirisýge daıyn. Buryndary medıtsına maqta-dáke maskasyn paıdalandy. Betperde jetispeıtin keıbir aýrýhanalar osyndaı maskany qoldanýda. Oblys turǵyndary osyndaı qorǵanys maskasyn qoryqpaı qoldana berýlerine bolady», - dedi basqarma basshysy.
Sonymen qatar, ol atalmysh dertke shaldyqqandardy qabyldaıtyn gospıtalder daıyn ekenin aıtyp ótti. Onyń biri Aqmola oblystyq týberkýlezge qarsy dıspanseri bolsa, ekinshisi oblystyq teri aýrýlary dıspanseri. Budan bólek, aýdandarda 70 oryndyq bokstendirilgen oryn ashylyp otyr.
Al Kókshetaý qalasynda shetelden kelgenderdi karantınge ornalastyratyn medıtsınalyq kolledj bazasynda 320 adamǵa arnalǵan jataqhana bar. Aýrýhanalarda naýqastardyń jazylyp shyǵýyna barlyq jaǵdaı qarastyrylyp otyr.
