Kókshetaýlyq Vıktorııa Kleptsova asyrap alǵan ata-anasyna alǵys aıtty

NUR-SULTAN. QazAqparat – Kókshetaý pedagogıkalyq kolledjiniń 1-kýrs stýdenti, qazaq tili baıqaýlarynyń jeńimpazy Vıktorııa Kleptsova ózin asyrap alǵan ata-anasyna alǵys bildirdi, dep habarlaıdy QazAqparat tilshisi.

«Alǵys aıtý kúni – beıbitshilik pen kelisimniń kórinisine aınalǵan jarqyn mereke. Búgingi keremet merekede eń aldymen meni baýyryna basyp, aıalaǵan, asyrap alýshy ata-anam – Saıran Qazybaıuly men Gúlnar Ámirjanqyzy Ybyraevtarǵa shyn júrekten alǵys aıtamyn! Men úshin olar álemdegi eń qymbat, eń meıirimdi jandar», - dedi Vıktorııa Kleptsova Táýelsizdiktiń 30 jyldyǵy men Alǵys aıtý kúniniń 5 jyldyǵyna arnalǵan dóńgelek ústelde.

Saıran men Gúlnar Ybyraevtar Vıktorııa men onyń eki baýyryn asyrap alǵan.

«Ata-anamnyń arqasynda meniń balalyq shaǵym baqyt pen qýanyshqa, umytylmas sátterge toly. Men ata-anamdy, ózimniń týǵanymdaı bolǵan Bahtııar, Aldııar jáne Elaman aǵalarymdy qatty jaqsy kóremin, erekshe syılaımyn jáne árqashan maqtan tutamyn. Qazaq halqy ata zamannan jetimin jylatpaǵan el, árqashan bala tárbıesine erekshe mán bergen el. Osynyń ózi meniń basymnan ótken jaǵdaıdyń taǵy bir dáleli dep oılaımyn. Álemdegi barlyq bala baqytty bolýǵa laıyqty. Elimizdegi árbir otbasyna yntymaq, dostyq, izgilik, syılastyq pen qurmet tileımin», - deıdi Vıktorııa Kleptsova.

Aıta keteıik, 2016 jyldyń 14 qańtarynda Elbasy Nursultan Nazarbaev Jarlyqqa qol qoıyp, 1 naýryz - Alǵys aıtý kúni dep jarııalandy. Dál osy 1 naýryz kúni elimizde Qazaqstan halqy Assambleıasy qurylǵan bolatyn.