Kókshetaýlyq veloshabandoz Azııa kýbogyn jeńip aldy
KÓKShETAÝ. QazAqparat - Kókshetaýlyq veloshabandoz, 18 jastaǵy Andreı Chýgaı Úndistanda ótken Azııa kýbogynyń chempıony atandy, dep habarlaıdy QazAqparat tilshisi Aqmola oblysynyń dene shynyqtyrý jáne sport basqarmasynyń baspasóz qyzmetine silteme jasap.
Vedomstvonyń málimetinshe, Úndistannyń Nıý-Delı qalasynda erler arasynda velotrekten Azııa kýbogy ótti. Ulttyq qurama sapynda bolǵan № 7 oblystyq mamandandyrylǵan balalar-jasóspirimder olımpıadalyq rezerv mektebiniń tárbıelenýshisi Andreı Chýgaı «Keırın» ádisi boıynsha ekinshi oryn alsa, «Sprınt» ádisi boıynsha qurlyq chempıony atandy.
Jattyqtyrýshysy Ivan Grınbergtiń aıtýynsha, Andreı «halyqaralyq dárejedegi sport sheberi» ataǵyna ıe bolǵan.
«Qazirgi kezde Andreı ulttyq qurama sapynda Álem kýbogynyń kezeńdik jarysyna daıyndalý ústinde. Onda sportshylar Olımpıadaǵa irikteýden ótedi», - dep túsindirdi I. Grınberg.
