Kókshetaýlyq stýdentter elektromobıl qurastyryp shyǵardy
KÓKShETAÝ. QazAqparat - Kókshetaýdaǵy kolledj stýdentteri 2,5 aıdyń ishinde kún sáýlesinen qýaty alatyn bir kisilik shaǵyn elektromobıl qurastyryp shyǵarǵan. Bul týraly atalmysh bilim mekemesiniń avtomehnık mamandyǵy bóliminiń meńgerýshisi Baqtııar Qońyrbaev aıtty, dep habarlaıdy QazAqparat tilshisi.
Onyń sózinshe, ekologııalyq jaǵynan taza ári janarmaı shyǵyndamaıtyn kólik saǵatyna 10 shaqyrym jyldamdyqpen 2 shaqyrym qashyqtyqqa deıin júrip óte alady. Bul kóliktiń ózgelerden basty ereksheligi kúnniń kózinen qýat alatyndyǵynda bolyp otyr. ıAǵnı ádettegi qozǵaltqyshtyń ornynda munda elektr motory ornatylǵan. Ol kóliktiń aldyńǵy mańdaıyndaǵy taqtalar arqyly kún sáýlesiniń qýatyn akkýmýlıatorǵa jınaıdy. Sonyń kómegimen kólik qozǵalady.
«Bastama 2016 jyly dúnıege keldi. Bul Astanada ótken «EKSPO-2017» kórmesi qarsańy bolatyn. Kórme bizdi shabyt berdi. Kórmege óz úlesterin qosý maqsatynda bir top stýdent balamaly energııa kózin qoldanatyn kólikti jasaýǵa kiristi. Nátıjesinde 2,5 aıdyń ishinde alǵashqy elektromobıldi qurastyryp shyǵardyq», - deıdi Baqtııar Qońyrbaev.
Qoldan qurastyrylǵan elektromobıl qarapaıym. Qańqasy polıetıllen qubyrlarynan jasalǵan. Oǵan elektromotor men kún energııasynan qýatyn alatyn panel ornalastyrylǵan. Panel Qytaıdan satyp alynǵan. Jobanyń quny 50 myń teńge turady. Qazrgi kezde, bilim ordasynyń stýdentteri jobany odan ári jetildirý boıynsha jumys isteýde.
«Ázirge, elektromobıl óndirisi týraly oılanyp jatqan joqpyz. Bul kólikti múmkindigi shekteýli jandar ǵana qoldana alady. Keleshekte, qozǵaltqyshynyń qýatyn arttyrý josparda bar. Ol úshin ınvestıtsııa qajet. Eger ondaı múmkindik bolyp jatsa, Kókshetaý qalasy men Býrabaı kentinde elektromobılderdi qýattaıtyn arnaıy stansa ashý jobasyn da júzege asyrý oıda bar», - deıdi Baqtııar Qońyrbaev.
