Kókshetaýlyq stýdentter 2,5 aıdyń ishinde elektromobıl qurastyryp shyǵardy
KÓKShETAÝ. QazAqparat - Kókshetaýdaǵy joǵary kolledj stýdentteri 2,5 aıdyń ishinde kún sáýlesinen qýat alatyn bir kisilik shaǵyn elektromobıl qurastyryp shyǵarǵan. Bul týraly atalmysh bilim ordasynyń avtomehanık mamandyǵy bóliminiń meńgerýshisi Baqtııar Qońyrbaev aıtty, dep habarlaıdy QazAqparat tilshisi.
Onyń sózinshe, ekologııalyq jaǵynan taza ári janarmaı shyǵyndamaıtyn kólik saǵatyna 10 shaqyrym jyldamdyqpen 2 shaqyrym qashyqtyqqa deıin júrip óte alady. Bul kóliktiń ózgelerden basty ereksheligi kúnniń kózinen qýat alatyndyǵynda bolyp otyr. ıAǵnı ádettegi qozǵaltqyshtyń ornynda munda elektrli motor ornatylǵan. Ol kóliktiń aldyńǵy mańdaıyndaǵy taqtalar arqyly kún sáýlesinen taraıtyn energııany akkýmýlıatorǵa jınaıdy. Sonyń kómegimen kólik qozǵalady.
«Ideıa 2016 jyly dúnıege keldi. Bul Astanada ótken «EKSPO-2017» kórmesiniń qarsańy bolatyn. Kórme bizdi qamshylady. Kórmege óz úlesterin qosý maqsatynda bir top stýdent balamaly energııa kózin qoldanatyn kólikti jasaýǵa kiristi. Nátıjesinde 2,5 aıdyń ishinde alǵashqy elektromobıldi qurastyryp shyǵardyq», - deıdi Baqtııar Qońyrbaev.
Qoldan qurastyrylǵan elektromobıl qarapaıym. Qańqasy polıetıllen qubyrlarynan jasalǵan. Oǵan elektromotor men kún energııasynan qýatyn alatyn panel ornalastyrylǵan. Panel Qytaıdan satyp alynǵan. Jobanyń quny 50 myń teńgeni quraıdy. Qazirgi kezde, bilim ordasynyń stýdentteri jobany odan ári jetildirý boıynsha jumys isteýde.
«Ázirge, elektromobıl óndirisi týraly oılanyp jatqan joqpyz. Bul kólikti múmkindigi shekteýli jandar ǵana qoldana alady. Keleshekte, qozǵaltqyshynyń qýatyn arttyrý josparda bar. Ol úshin ınvestıtsııa qajet. Eger ondaı múmkindik bolyp jatsa, Kókshetaý qalasy men Býrabaı kentinde elektromobılderdi qýattaıtyn arnaıy stansa ashý jobasyn da júzege asyrý oıda bar», - deıdi Baqtııar Qońyrbaev.
