Kókshetaýlyq oqýshy matematıkadan eki Halyqaralyq olımpıadanyń júldegeri atandy
KÓKShETAÝ. QazAqparat - Kókshetaý qalasyndaǵy «Bilim-ınnovatsııa» lıtseıiniń oqýshysy Halyqaralyq matematıka olımpıadalarynyń júldegeri atandy, dep habarlaıdy QazAqparat tilshisi.
Aqmola oblystyq bilim basqarmasy baspasóz qyzmetiniń málimetinshe, bıylǵy jylǵy naýryzdyń 9-10 aralyǵynda onlaın rejımde Azııa-Tynyq muhıty 33-shi Halyqaralyq matematıka olımpıadasy jáne «Jibek joly» 20-shy Halyqaralyq matematıka olımpıadasy ótti.
Atalǵan zııatkerlik olımpıadalardy ótkizýdiń negizgi ıdeıasy – matematıka ǵylymdary salasynda daryndy oqýshylardy anyqtaý, damytý jáne qoldaý úshin jaǵdaı jasaý, sondaı-aq qatysýshy elder arasyndaǵy halyqaralyq bilim berý jáne ǵylymı baılanystardy damytý.
Oǵan Qazaqstannan barlyǵy 150 oqýshy qatysty. Onyń ishinde Aqmola oblysynyń namysyn Kókshetaý qalasyndaǵy «Bilim – ınnovatsııa» lıtseı-ınternatynyń oqýshylary Mırat Hamıtov, Álıhan Muqashev, Dıdar Dáýletbaı, Ádilhan Alpysbaı, Arslan Damınov jáne Nur-Sultan qalasyndaǵy daryndy balalarǵa arnalǵan №2 oblystyq mamandyrylǵan mektep-ınternatynyń oqýshysy Dıdar Qabylbek qorǵady.
Olımpıada qorytyndysy boıynsha «Bilim – ınnovatsııa» lıtseı-ınternatynyń 11-synyp oqýshysy Arslan Damınov Azııa-Tynyq muhıty 33-shi Halyqaralyq matematıka olımpıadasynda úshinshi oryn jáne «Jibek joly» 20-shy Halyqaralyq matematıka olımpıadasynda ekinshi oryn aldy.
Aıta keteıik, túrli deńgeıdegi bilim berý jarystarynyń birneshe dúrkin jeńimpazy Arslan Damınov Qazaqstan-Brıtan tehnıkalyq ýnıversıteti grantynyń ıegeri.
