Kókshetaýlyq medbıke: Medıtsınalyq kómek kórsetý - meniń kásibı mindetim ári adamı paryzym
KÓKShETAÝ. QazAqparat - «Jaqsynyń jaqsylyǵyn aıt, nury tasysyn» degen qazaq. Bizdiń búgingi keıipkerimiz Baıan Qýanyshbaıqyzy Kókshetaý qalalyq emhanasynda medbıke bolyp qyzmet atqarady. Halyqaralyq medbıke kúnine oraı QazAqparat tilshisi osy bir aıaýly janmen jaqynyraq tanysyp, sózge tartqan edi.
Bir áýlettiń bereke-birliginiń uıytqysy, bir ujymnyń úlgi tutar qadirlisi bolyp otyrǵan aq halatty abzal búgingi tańda Kókshetaý qalalyq emhanasynyń №226 ýchaskesinde medbıke bolyp eńbek etedi. Ýchaskede 1800 adam tirkelgen bolsa, kún saıyn 16 adamǵa medıtsınalyq kómek kórsedi. Al, qalǵan ýaqytynda júrip-turýy qıyn qart adamdar men jańa týǵan sábılerdiń úılerine baryp, jaǵdaılaryn kóredi.
«Aýrý azabyn tartyp, kómek suraı kelgen naýqasqa qaraılasý, qoldan kelgen medıtsınalyq kómek kórsetý meniń kásibı mindetim ári adamı paryzym», - deıdi ol.
Baıan Qýanyshbaıqyzynyń medıtsına salasynda eńbek etip jatqanyna bıyl 30 jyl tolyp otyr. Kókshetaý medıtsınalyq ýchılışesin támámdaǵan kezde ol nebary 18 jastaǵy uıań qyz edi. Sodan beri ol bar ǵumyryn jas urpaqtyń saýlyǵy úshin aıanbaı eńbek etýge arnap keledi. Júzinen meıirim, ár sózinen parasat-paıym seziletin maman óz ortasyna syıly, abyroı bıiginen kórinip júrgen jan. Kezinde oqý ornyn bitirgen soń, bilimin tájirıbemen ushtastyryp, qıyndyǵy men jaýapkershiligi zor qyzmetinde alǵysqa bólene bildi. Jaqsy medbıke bolý úshin uqyptylyq, jaýapkershilik degen qasıetter azdyq etedi. Ol úshin kúndelikti tájirıbe kerek deıdi ózi.
– Bizder tek qana kishkentaı balalarmen emes, sonymen qatar, eresektermen de jumys isteımiz. Sebebi, eresek adam qaı jeriniń aýyryp turǵanyn aıta alsa, balalar aýyratyn jerin aıta almaıdy. ıAǵnı, mundaıda medbıke eń birinshiden jaqsy psıholog bolýy tıis, – deıdi ol.
Keıipkerimiz dári-dármek qana emes, sondaı-aq, ár jan úshin jyly sózdiń ózi úlken em ekenin aıtady. Sol sebepti jan-jaǵyndaǵylarǵa meıirimniń shýaǵyn sebezgilep júretin Baıan Qýanyshbaıqyzy óziniń kúsh-jigerine, bilimine senip, ár balanyń syrqaty jazylýyn tilep, barynsha kómektesýge tyrysady.
«Meniń atqaryp júrgen jumysym kúndelikti kózge kórinedi. Maǵan baǵa beretin - balalar. Al, bala degen - perishte. Solardyń alǵysyn alsam, men úshin odan artyq ataq joq», – deıdi ol.
Degenmen, Baıan Qýanyshbaıqyzy joǵary sanatty medbıke atanyp, ujymda syıly jan bola bildi. Al, qazir aýrýhanaǵa oqýyn endi aıaqtaǵan jas mamandar kelýde. Sol jastardy kórip, keshegi óziniń 18 jastaǵy kezin elestetip, olarǵa analyq aqylyn aıtýdy paryzy sanaıdy.
Aıta keteıik, búgingi tańda Aqmola oblysynda 500-den astam medıtsınalyq uıym bar. Óńirde barlyǵy 6 myńnan astam medbıke jumys isteıdi.
Álemdi alańdatyp otyrǵan koronavırýs indetine jáne elimizde engizilgen karantın rejımine baılanysty Aqmola oblysynyń densaýlyq saqtaý salasynda eńbek etip júrgen medıtsına qyzmetkerleri de óńir turǵyndary arasynda sanıtarlyq, gıgıenalyq jumystardy tynymsyz júrgizýde.
