Kókshetaýlyq komanda Qazaqstan kýbogynyń ekinshi kezeńinde jeńiske jetti
KÓKShETAÝ. QazAqparat - Kókshetaýlyq «Kókshetaý-Winkod» komandasy «Samuryq-2019» qysqy rallı sprıntinen QR kýbogynyń ekinshi kezeńinde top jardy, dep habarlaıdy QazAqparat tilshisi.
Aqmola oblysynyń dene shynyqtyrý jáne sport basqarmasy baspasóz qyzmetiniń málimetinshe, Qaraǵandy qalasynda ótken jarysqa Almaty, Astana, Kókshetaý, Pavlodar, Qaraǵandy, Petropavl, Aqkól, Ekibastuz, Aqsý, Jezqazǵan jáne Óskemen qalalarynan jınalǵan komandalar qatysty.
Kókshetaýlyq ekıpaj jaqsy nátıje kórsetti. Týrnır kestesinde eki kezeńniń qorytyndysy boıynsha «Kókshetaý-Winkod» qarsylastarynan oq boıy alda keledi.
Komanda jetekshisi, avtosporttan ulttyq quramanyń múshesi Ramıl Nabıýlın bastaǵan komanda músheleri Áset Qudarov, Vlad Larıýshın, Ilıa Pasternak, Ilıa Jýravlev, Pavel Shýmılov, Valerıı Nadjafov, Denıs Lýtsenko, Evgenıı Mýrygın jáne Vıtalıı Kachıgarov Qazaqstan kýbogy úshin baryn salatynyn aıtýda.
«Qazirgi kezde avtosportqa qyzyǵýshylyq joǵary. Bul sport túrimen kásibı aınalysý adamdarǵa kúndelikti ómirde, kólik júrgizgen kezde qaýipsiz bolýǵa úıretedi», - deıdi R.Nabıýlın.
«Samuryq-2019» qysqy rallı sprıntinen QR kýbogynyń kelesi kezeńi Pavlodarda, al fınaldyq jarysy Astanada ótedi.
