Kókshetaýlyq kásiporyn vaktsına alyp jatqandarǵa kún saıyn sý jetkizip beredi

KÓKShETAÝ. QazAqparat – Kókshetaýda vaktsına alǵandar arasynda utys oıyny uıymdastyrylyp, aqshalaı syıaqy jáne dárýmender berilip jatyr. Bul týraly qala ákiminiń orynbasary Ýaqyt Bekaıdaruly málim etti, dep habarlaıdy Qazaqparat tilshisi.

Onyń aıtýynsha, Kókshetaý qalasynda turǵyndarǵa vaktsına salý jumysy qarqyndy júrip jatyr.

Atalmysh naýqanǵa medıtsına qyzmetkerlerimen birge, bıznes salasy da atsalysýda.

«Kún saıyn «Turan» (Kókshetaý mıneraldy sýlary) aktsıonerlik qoǵamy №1 qalalyq emhanaǵa vaktsına alǵandar úshin 100 shólmek sý jetkizip beredi. Bul bastama halyqtyń vaktsına alýyn yntalandyrý úshin qolǵa alynǵan. Memlekettik organdar men kommýnaldyq qyzmetter jumysshylaryna bir kúndik demalys berip otyr. Máselen, «Aqsaı nan» JShS ekpe alýǵa barǵan ár jumysshyǵa eki kún boıy 2 myń teńgeden aqsha beredi», - deıdi qala ákiminiń orynbasary.

Sonymen birge, Krasnoıar kentindegi bastaýysh medıtsınalyq-sanıtarlyq kómek kórsetý ortalyǵy vaktsına alǵan ár turǵynǵa dárýmen úlestirýde.

Al, oblys ortalyǵyndaǵy «Asyl arman» JShS kún saıyn vaktsına alǵandar arasynda 100 000 teńgeniń utysyn ótkizip júr.

Aıta ketsek, pandemııa bastalǵannan beri Kókshetaý qalasynda 7 765 jaǵdaı tirkeldi, onyń ishinde 5761 - belgileri bar, 2004 - sımptomsyz.

Búgingi tańda ınfektsııalyq statsıonarlarda 246 patsıent em alyp jatyr. Infektsııalyq statsıonarlardyń tósek qorynyń tolý kórsetkishi - 67 paıyz.

Onyń ishinde óte aýyr jaǵdaıda, ókpeni jeldetý apparatyna 4 adam qosylǵan, aýyr jaǵdaıda ottegi qoldaýyndaǵy 30 adam bar.

Osy rette, oblys ortalyǵynda turǵyndardy vaktsınatsııa jumysy júrgizilýde. Búgingi tańda qalaǵa vaktsınanyń 37 myńǵa jýyq dozasy kelip tústi.

Qala boıynsha 20 egý pýnkti ashyldy. Ekpe alý úshin qala boıynsha mobıldi pýnktiler ashylǵan.

Sondyqtan kez kelgen adam yńǵaıly ýaqytta «Sputnik V», «Qaz Vac» jáne «Hayat Vac» vaktsınalaryn tańdaı alady.

Qazirgi ýaqytta qajetti qor qamtamasyz etilgen.