Kókshetaýlyq Elızaveta Bıbrıh memlekettik til baıqaýynda top jardy

KÓKShETAÝ. QazAqparat - Aqmola oblysynda «Qazaqstan - baqytymnyń ordasy!» atty oqýshylar arasynda memlekettik tildi meńgerýge arnalǵan oblystyq baıqaý ótti.

Oblystyq bilim basqarmasy men ónerpaz daryndy balalarmen jumys júrgizý jónindegi oblystyq oqý-ádistemelik ortalyǵy birlesip uıymdastyrǵan baıqaýǵa Atbasar, Býrabaı, Bulandy, Zerendi, Shortandy aýdandary men Stepnogor jáne Kókshetaý qalalarynan kelgen 13-15 jas aralyǵyndaǵy mektep oqýshylary qatysty.

Memlekettik tildiń qoldaný aıasyn keńeıte túsý, til mádenıetin kóterý, til saıasatynyń pármendiligin arttyrý, oqýshylar arasynda qazaq tilin meńgergen ózge ult jastaryna qoldaý kórsetý, olardyń sóıleý mádenıetiniń deńgeıin kóterý jáne memlekettik til mártebesin nyǵaıtý maqsatynda uıymdastyrylǵan baıqaý qorytyndysyna saı, ózgelerden oza shaýyp, qarsylastarynyń arasynan sýyrylyp shyqqan kókshetaýlyq Elızaveta Bıbrıh birinshi oryn alsa, zerendilik Vıktorııa Kleptsova  ekinshi oryndy enshiledi, sondaı-aq býrabaılyq Tamara Pogosıan men shortandylyq Daıana Potapova  júldeli 3 orynnan kórindi.

Baıqaýǵa qatysýshylardyń barlyǵy arnaıy gramotalarmen jáne syılyqtarmen marapattaldy.