Kókshetaýlyq Bolat Batyrbaev «Balalar Jańa tolqyny-2013» halyqaralyq baıqaýynda el namysyn qorǵaıdy
ASTANA. 12 shilde. QazAqparat - Respýblıkalyq «Aıalaǵan Astana» baıqaýy elordanyń 15 jyldyq mereıtoıy qurmetine uıymdastyryldy.
Bul shyǵarmashylyq báseke Reseıdiń dańqty prodıýseri jáne rejısseri Lına Arıfýlınanyń «Juldyzdar fabrıkasy», «Mýzyka mektebi», «STS juldyzdy jaǵady» sııaqty keńinen tanymal kontsertter men telebaǵdarlamalar, mıýzıklder negizinde Qazaqstanda alǵash ret ótkizildi.
Astana qalasy resmı saıtynyń habarlaýynsha, baıqaýǵa 8 ben 15 jas aralyǵyndaǵy estrada ánderin oryndaýshylar qatysty.
Eske salaıyq, baıqaýdyń birinshi kezeńi irikteý týry retinde Qazaqstannyń barlyq oblys ortalyqtarynda ótti. Aımaqtyq jarystarda jeńiske jetken 12 jeńimpaz «Eýrazııa» birinshi arnasynda 4, 5, 6 shildede tikeleı efırde kórsetilgen jartylaı fınalǵa qatysýǵa quqyq aldy.
Birinshi kúni qatysýshylar balalyq ánuranyn oryndasa, ekinshi kúni - juldyzdarmen dýet qurdy. Al baıqaýdyń úshinshi kúni Astana merekesine arnaldy. «Aıalaǵan Astana» qazaqstandyqtar úshin keremet syılyq boldy.
Mýzykalyq jarystyń sońynda talanttaryn qazaqstandyq jáne reseılik estradanyń has sheberleri - Roza Rymbaeva, Nurlan Abdýllın, Baıǵalı Serkebaev, Domınık Djoker jáne basqa da adamdar baǵalaǵan baıqaýdyń jeńimpazdary anyqtaldy.
Birinshi oryn men kórermender kózaıymy júldesin «ChıPıKı» trıosy jeńip aldy. Ekinshi oryn qyzylordalyq Quralaı Meırambekke berildi. Úshinshi oryndy Semeıden kelgen Balaýsa Nııazbekova ıelendi. Astana qalasy ákiminiń júldesi JaHanger Jumabaevqa buıyrdy. Al, «Aıalaǵan Astana» televızııalyq baıqaýynyń bas júldesi - gran-prı Kókshetaýdan kelgen 13 jasar Bolat Batyrbaevqa tapsyryldy. Endi ol Artektegi «Balalar Jańa tolqyny-2013» halyqaralyq baıqaýynda elimizdiń namysyn qorǵaıtyn bolady.
