Kókshetaýlyq balalarǵa túrli merekelik sharalar usynyldy
KÓKShETAÝ. QazAqparat - Kókshetaýda 1 maýsym - Halyqaralyq balalardy qorǵaý kúni sán-saltanatpen atalyp ótildi, dep habarlaıdy QazAqparat tilshisi.
Bul kúni «Abylaı han» alańy ádettegiden de erekshe nuralana tústi. Syńǵyrlaǵan sábılerdiń kúmis kúlkisine toldy.
Halyqaralyq balalardy qorǵaý kúnine jáne Astananyń 20 jyldyǵyna arnalǵan balalar men jasóspirimderdiń mýzykalyq ansambliniń sherýimen bastaldy.
Sherýge mektep jáne kolledj oqýshylary, mektepke deıingi mekemelerdiń tárbıelenýshileri, pedagogtar men balalar, jastar mýzykalyq ansamblderi jáne orkestri qatysty. Bıylǵy jyly balalar men jasóspirimderdiń mýzykalyq ansambliniń sherýinde 1 200-den astam bala óner kórsetti.
«Merekelik sharaǵa nemerelerin jetektegen ata-ájeler men balalaryn ertken ata-analar kóptep jınaldy. Onda balalarǵa arnalǵan túrli baıqaýlar men teatrlandyrylǵan kórinister, balalar ujymynyń merekelik kontserti usynyldy», - deıdi Aqmola oblysynyń bilim basqaramasy baspasóz hatshysy Dınara Esenbaeva.
